Folketingi

Hammond: Isornartorsiorneqarnera paasilluarsinnaavara

Aleqa Hammond (S) aningaasatigut atornerluisimasinnaanermut tunngasumik suliaqartitseqqinnermini kingorna, siullermeerluni tusagassiorfimmut nassuiaateqarpoq

Qaammatit 14-it matuma siorna Aleqa Hammondip (S) politikkikkut atorfeqarnini Folketingimi ilaasortatut aallarteqqikkamiulli maanna aningaasatinik atuisimanermik suliamik aallartitseqqippoq.

Taamani Naalakkersuisunut siuttuugallarami pisortat korti akiliutaat nammineq aningaasartuutiminut atornikuuaa.

Aleqa Hammond (S) folketingimi ilaasortat ataatsimiinnernut atatillugu angalanernut aningaasartuutinut korti akiliutitut atorneqartartoq Brugsenimi Starkimilu aamma Nuummi pisiniarfinni allani upernaaq atorsimavaa.

Katillugu 12.000 koruunit sinnerlugit pisiniutigisimavai, Folketingillu aningaasat uterteqqullugit saaffigisimavaat.

Atuisimasoq
Hammondip sapaatiummat suliaq oqaaseqarfigiumanngilaa, Facebookimilu paatsoornertut tamanna taavaa, tassami nammineq korti akiliutaa atornerluneqarsimammat.

Kisianni politikerip ataasinngornermi KNR-imut nassuerutigaa, kortip akiliutip qanoq atorsimaneranut taakkununngalu malittarisassaasut pillugit isumaqatigiinngittoqarsinnaasoq.

- Suliakkiissutigineqartunit allaanermik suliaqarnissara siunertarinngilara. Isumaqarpungalu uani susassaqavittut uangalu ataatsimoorluta aaqqitassat aaqqittariaqarivut, Aleqa Hammond Radioaviisimut oqarpoq.

KNR-imi takuuk: Aleqap akiitsoqarnini nassuerutigaa

- Pisassaqaaluppunga, tassami Folketingip allattoqarfia oqaloqatigissavara qulaajagassat arlaqarmata. Tusagassiuutitigut allakkulluunniit oqallinneq pinngitsoorniarlugu allattoqarfik ataatsimeeqatiserinikuuara.

Hammond isornartorsioraa
Arlalinnit - ilaatigut Siumup Inuusuttaasa - ullumikkut isornartorsiuisoqarpoq.

- Uagut inuusuttut aningaasanik atornerluineq akuerisinnaanngilarput. Tatigineqarlutik qinikkat taamaaliortassanngitsut kissaatigaarput, siulittaasoq Steve Olsvig Sandgreen oqarpoq.

Atuaruk: Siumup Inuusuttaasa Hammond isornartorsioraat

Aleqa Hammondip KNR-imut nassuiarpaa, amerlasuut suliat taama ittut pillugit naammatseqqanerat paasisinnaallugu.

- Soorunami innuttaasut qisuariaataat paasisinnaavakka, aamma isornartorsiuisut paasisinnaavakka. Taassumalli saniatigut tunuliaqutsiisorpassuaqarpoq. Taakku tamarmik inissaqartinneqartariaqartut isumaqarpunga.

Atuaruk: Aleqa Hammond: Ajornartoornermi korti atorpara

Powered by Labrador CMS