Hammond aamma Kleist suli akiitsoqarput

Naalakkersuisut kukkunersiuisut Naalakkersuisuni ilaasortaasimasut nunattaa karsianik atuisarsimanerannut misissuinerannut oqallisaaqisumut oqaaseqataanni erserpoq Siumumeersoq Aleqa Hammond aamma Inuit Ataqatigiinnersoq Kuupik Kleist nunatta karsianut suli akiitsoqartut.

- Aleqa Hammondip Namminersorlutik Oqartussanut akiligassaanut tunngatillugu, Namminersorlutik Oqartussat Deloittep paasinninnera tunngaviusumik malinniarpaat, aammalu akiligassat Namminersorlutik Oqartussat sussaqarfiginngisaat akileqqussallugit.

- Aalajangersimasumik Aleqa Hammondip nammineq inuttut angalanerata malitsigisaanik aningaasartuutaanerusut Deloittep uparuagai Namminersorlutik Oqartussat nalilersoqqinniarpaat, aammalu akiligassiissutit misissoqqereerneranni Deilottep inerniliineratut Namminersorlutik Oqartussat inerniliippata, aningaasartuutit Aleqa Hammondimut akiligassiissutigalugu ingerlateqqinneqassapput.

- Barimut akiligassaq, kukkusoqarnerani Namminersorlutik Oqartussat ataanni ingerlatsinermi akilerneqarsimasoq, Aleqa Hammondimut akiligassiissutigalugu ingerlateqqinneqassaaq.

- Kisianni kukkunersiuisut nalunaarusiaata saqqummersinneqareernerata kingorna billetsinut Aleqa Hammondimut tunngassuteqartumik akiligassiissutini ataasiakkaani kreditnotamik tigusaqartoqarpoq, taamaattumik taakkua matuma siuliani allassimasunut ilanngaatigineqartussaassallutik.

Taama Naalakkersuisut kukkunersiuinermik suliaqartut Deloittekkut Naalakkersuisuni ilaasortaasarsimasut nunatta karsianik atuisarsimanerannut tunngasunik piffissamut 2009-imiit 2014-imut misissuinerannut oqaaseqarput.

Ukua akiitsorsimanngillat
Naalakkersuisut misissuinermut oqaaseqaataanni erserpoq Naalakkersuisuni ilaasortaasimasut misissuiffigineqartunut ilaasut maleruagassanik unioqqutitsisarsimanngitsut.

Soorlu Ane Hansen, Naalakkersuisuunermi nalaani pisortanit nammineq inuttut atugassaminut akiliutsinngisaannarsimavoq.

Steen Lyngep akiligassarilersimasani akilereersimavai.

Anthon Frederiksenip Namminersorlutik Oqartussanut akiligassaqarnerarneqarnera naliliiffigineqarsimavoq suliaminut atatillugu aningaasartuuteqarsimasoq, kiisalu Inuit Ataqatigiinnersoq Ove Karl Berthelsen, aamma Naalakkersuisunit akiitsoqarnerarneqanngilaq, taannami maleruagassat atuuttut malillugit iliuuseqarsimammat.

Kuupik Kleist suli akiitsoqarpoq
Siumumeersoq Aleqa Hammond assigalugu Kuupik Kleist Namminersorlutik Oqartussanut suli akiitsoqarpoq.

- Pissutsinut allassimasunut Kuupik Kleistip suli akiligassaqarnerarneqarneranut tunngassuteqartunut tunngatillugu Naalakkersuisut oqaatigisinnaavaat, ulloq 1. august 2013, aningaasartat 20.288 koruunit akiliisitsiniarnissamut ingerlatinneqareersimammata. Taamaattumik tamanna aamma DsR-ip akiitsunut naatsorsuutini allattuiffianiigunnaareersimavoq. 20.288 koruunit taakkua akiligassanut sisamanut tunngassuteqarput.

- Aningaasat taakkua suli nalimmassarneqanngillat, taamaattumillu kukkunersiuisut nalunaarusiaanni ilanngunneqarsimallutik.

- Suliaq pissutsinut taakkununnga tunngasoq akiliisitsiniartarfik aqqutigalugu immikkut ingerlammat Naalakkersuisut taakkununnga tunngatillugu annertunerusumik iliuuseqarnianngillat.

Naalakkersuisunit aamma ilisimatitsissutigineqarpoq kukkunersiuisut nalunaarusiaanni akiligassanut tunngasut arlalissuit uparuarneqarmata, taakkua matuneqarsimanerat imaluunniit peqqissaartumik matuneqarnissaat qulakkeerniarlugu Namminersorlutik Oqartussat aammaarlutik Kuupik Kleistimut tunngasut misissoqqinniaraat.