Hammeken: Immikkut akitsuuteqartitsisoqanngilaq imaluunniit ersinngitsunik qaffaasoqanngilaq
Royal Arctic Linep pisortaa, Verner Hammeken,oqarpoq, suliffeqarfiit kiffartuussineruppitsanngoriaateqarsimannginneranik oqarnerateqqortuunngitsoq, tapiliussanillu assartuinermut akitqaffasinnerulersinneqarsimanerannik oqaatiginiarneqartutilumuunnginnerarlugit.
Suliffeqarfinnit oqaatigineqartut pissarsiarisimasaasa ilarpaaluinit oqaatigineqarpoq, Eimskipimik assartuusseqateqarnermut ingerlaarfinnullu nutaanut atatillugu kiffartuussinerup pitsanngoriaateqarsimanera misigineqarsimanngitsoq. Allaammi ilaat assartuinermi akunninnermi sivisunerulaartumik uninngatinneqartalersimasut. Arlalinnit aamma annerusumik minnerusumilluunniit kinguaattoornerit misigineqartarsimapput (qaammatit kingulliit qulingiluat ingerlaneranni ingerlatsinermi allannguutinik nalunaarutit 104-t). Pissutsinut tamakkununnga qanoq oqaasissaqarpit?
– Ukioq kaajallallugu sapaatip-akunneri tamaasa umiarsuaqartarpugut. Oqaluttuarisaanermi nutaatut Kalaallit Nunaata, Islandip, Savalimmiut aamma Sverigep akornanni siumut utimullu attaveqartoqalersimavoq. Assartuinerup sivisussusia (assartugassat tunniunneqarnerannit tiguneqarnerinut) nalinginnaasumik Aarhusimit isigalugu sivisunerunngilaq. Nillataartitanik qerisunillu allanngortiterineq novembarimi 2021-mi iluaqutigineqalissaaq, ullunik marlunnik sivikinnerulersitsisoqassammat. Sulili pingaarnerusumik, nassiussat akunninnermi uninngatinneqarnermut misikkarissorujussuit maanna annertunerusumik Islandimi suliarineqartalerput, taamaattumik tassani piffissaq uninngatitsiviusoq affaannanngorsimasoq pineqarpoq. Tamatuma kinguneranik nioqqutinik tamakkuninnga maanngaannartitsisarneq annikillerujussuarpoq, tamannalu aningaasartuutinik apparsimaartitseqataavoq. Tunumi »nammineq« umiarsuaatigisaq (Nanoq Arctica) Reykjavik aqqutigalugu kiffartuussinerup akulikissusaa qaffatsinneqarsimavoq ullut 14-ikkaalersillugu assartuinerlu sukkanerulersinneqarsimalluni. – Ingerlatsinermi allannguutinik nalunaarutit 104-nik amerlassuseqarsimanerat allaatigivat, kisianni isumaqarpugut tamanna assartuussinermi allannguutinik, silamik, anorimik allanillu sullitanut malinnaatitsisarnitsinnut ersiutaasoq, tamannalu pitsaasuuvoq. Tamatuma saniatigut Nuummut tikittarnerup akulikissusia ullunut taarsiullugu akunnerit atorlugit uuttortalersimavarput, tamannalu immini pitsaassutsimik qaffasinnerulersitsisimanermut ersiutaavoq, Verner Hammeken Sermitsiamut oqarpoq.
Akit aalajangiusimaneqarsimasut Ilissi nammineq allappusi, assartuinermut akinik aalajangiusimannissimasusi, kisianni suliffeqarfiit ilaannit tusarpara, assartuinermut akit qaavisigut tapiliussat assigiinngitsut misigineqartartut. Tapiliussanik assigiinngitsunik atuutilersitsisimanersi ilumoorpa? Tapiliussat suut-uku? Qanoq atuutsinneqartarpat? Atorunnaarsinneqaqqikkumaarpat?
– Paasissutissat piviusut pigaavut, siornatigut aamma takutissimasatsitut oqaatiginiakkatsinnullu uppernarsaatigisinnaasavut: Akiligassaq 2015-imeersoq akiligassarlu 2021-meersoq taamaallaat Uuliamut/ Aningaasat nalingisa allanngorarnerinut tapiliussamik nikingassuteqarput, taakkualu plussiunngikkunik minusiusinnaapput. Tamatuma saniatigut Sikukimut umiarsualivimmut akitsuuteqarpoq (containerimut isikkanik 20-nik takissusilimmut ataatsimut 54 koruunit) kiisalu sullitanut inatsisitigut piumasaqaammut 2016-imeersumut atatillugu containeriutiminnik namminneq oqimaalutaanngitsunut VGM-imut akitsuuseqarluni 150 koruunit ataanniittunik. Royal Arctic Linep immikkut akitsuutit taakkua atuutilersissimanngilai imaluunniit assartuinermut akit ersinngitsunik qaffaasimanngilai, allaanerusumillu oqartup qanoq isumaqarnini tamanna uppernarsaateqarluni uppernarsartariaqarpaa. Tamatuma akerlianik assartuinermut akit appartingaatsiarsimavavut (30 procentit sinnerlugit) Kalaallit Nunaata iluani biilinik, umiatsianik sa naartortullu maskiinarsuinik assartuinernut siorna juulimi, Verner Hammeken erseqqissaavoq.
Oqaluttuaq tamaat Sermitsiami sapaatip akunnerani matumani saqqummersumi atuarsinnaavat, ugguuna iserfigiuk: