Hammeken: Containerinik amigaateqartarneq iluarsineqareerpoq

Royal Arctic Linep nassuerutigaa, containerinik amigaateqartarneq Kalaallit Nunaanni suliffeqarfinnut eqquisumik ajornartorsiutaasarsimasoq. - Tamannali maanna iluarsineqarsimalersoq, umiarsuaatileqatigiiffimmi pisortaq oqarpoq.

Brugseni ataasinngormat Royal Arctic Linemut arlalinnik isornartorsiuivoq, umiarsuaatileqatigiiffiup containerinik tunniussinissamut piffissaliussat isummani malillugu aquttarsimammagit.

Ilanngullu sanasut inniminnikkaminnik tigusiniartarnerat ajornartorsiutaasimavoq, ilisimatinneqarsimallutik tamatumunnga pissutaasoq inissaqartitsinnginneq.

Ilanngutassiaq atuaruk: RAL-ip sammiveqanngitsumik ingerlatsinera suliffeqarfinnut akeqartoq

Verner Hammekenip isornartorsiuineq ullumi takilaartumik allagaqarluni akissuteqarfigaa, akissutaa Sermitsiaq.AG-mit allanngortinnagu saqqummiuneqarpoq e:

Tamanna uani atuaruk: Royal Arctic Linep oqaloqatigiinneq kissaatigaa, sammiveqanngitsumik ingerlatsinerunngitsoq

RAL-imi pisortaanerup nassuerutigaa, umiarsuaatileqatigiiffiup juulip qaammataani containerit amigaatigineqartarnerat ajornartorsiutigisimagaa, ajornartorsiulli tamanna iluarsiiffigineqareernerarlugu.

- Ajornartorsiutit tamakku ataatsimut isigissagaanni tassaapput ikaarsaariarnerinnarmi atuuttut, Verner Hammeken allappoq, peqatigitillugulu oqaatigalugu, Eimskipimik assartueqateqartarneq coronap nunarsuarmi tuniluunneranit umiarsuarmiillu tunniussassat kinguaattoorutineqartarnerannit unammillernarsimasoq, tamatumalu malitsigisaanik umiarsuaq containerinik assartuut, ”Tukuma Arctica”-tut aamma Eimskipip umiarsuaataatut ”Dettifoss”-tut usisinnaatiginngitsoq atortariaqartarsimallugu. Umiarsuit taakku annertuunik useqarsinnaapput, tamanna siusinnerusukkut ajornartarsimasoq, taanna oqarpoq.

Suli nutaalioqqittoqarnissaanik pisariaqartitsisoqartoq

Verner Hammeken ilimagaa, oktobarip naalernerani Royal Arctic Line ingerlaaqatigiinnerup aallartisarnerata immikkoortuata aappaanut killippat nutaaliornerup timitalerneqarnera tamakkisunngussasoq.

Umiarsuaatileqatigiiffiup pisortaa naapertorlugu ”misileeqqaarsimaneq” iluaqutaasimavoq, naatsorsuutigisamillu unammilligassakinnerusoqarsimasoq.

Taanna isumaqarpoq RAL suli pitsanngorsagassaqartoq. Assersuutigalugu umiarsuaq tallimanngornikkut ullaakkut Nuummut tikikkaangat usinik tunniussisarneq. Tamannami pisiniarfinnut anginerusunut ajornartorsiutaasarpoq, nioqqutissaatitik tamaasa pissarsiarinngikkaangamikkit arfininngornikkut suliaqartariaqartarmata.

- Qularinngilarput suut tamarmik aaqqeriarpata suleqatigiilluta suleriaasissamik nassaarsinnaassasugut, Verner Hammeken Aarhusimi Islandimilu periarfissat nutaat atorlugit assartueqatigiittarnissamik pilersaarutip suli atuutilinnginneranik pakatsisoqarsimaneranik paasinnittoq allappoq.

RAL: - Isornartorsiuinerit tusarnaartarpavut

Verner Hammekenip naammaginngilluinnarpaa, tusagassiorfitsigut aamma soqutigisaqaqatigiiffimmit soorlu GE aqqutigalugu isornartorsiuisoqarnera.

- Taamatut avammuinnaq isornartorsiornerit eqqarsalersittarpaatigut ilumut kukkusimanersugut imaluunniit isornartorsiuineq allarluinnarmik tunngaveqarnersoq, Verner Hammeken oqarpoq.

- Tamakku tamatigut tusaaniartarpagut, pingaartumik toqqaannartumik sullissatsinneersuugaangata. Nalinginnaasumik tunngavissaqartarput, suliamut attuumassuteqarlutik ilinniutaasarlutillu. Pingaaruteqarpormi pitsaanerusumik suliarisinnaasagut pillugit toqqaannartumik oqaloqateqarsinnaasarnerput, umiarsuaatileqatigiiffimmi pisortaq allappoq. skriver rederidirektøren. Brugsenimili suliffeqarfinnilu allani misigineqartarsimavoq, RAL-imit tusaaniarneqannginneq.

Verner Hammekenip erseqqissaassutigaa, suliffeqarfiit pisaanerpaamik kiffartuunneqarnissaat kissaatigineqartoq, assartueqatigiittalernermilu iluaqutissaaneralugu, Kalaallit Nunaata nunarsuarmi tamarmi toqqaannartumik sunniuteqarluartumillu niueqateqalersinnaanera.

Appisaluussinerit

- Tusagassiuutit aqqutigalugit appisaluussinerup iluaqutissai Royal Arctic Linep takujuminaatsippai, kukkusumillu inerniliinerit pillugit naqqiissuteqartariaqarnermut nukitta atornissaat isumassaqartinnagu. Royal Arctic Line taamatut appisaluussinermut peqataanngisaannassaaq, neriuutigiinnarluguli sullitatta siunissami oqaloqatigiinneq toqqassagaat, piffissami kingullermi ineriartorneq nuanninngitsoq peqataaffiginagu, Verner Hammeken naggasiilluni allappoq.

Powered by Labrador CMS