Aalisarneq
Halibut Greenland tuniniarneqarpoq
Qeqertarsuup Tunuani qaleralinnik tunisinerup annikilligaluttuinnarnera Ilulissani suliffissuarmut unammillernarsimavoq
Ukiuni kingullerni inuussutissarsiornikkut ingerlalluarnerpaat ilaat, Ilulissani aalisakkanik suliffissuaq Halibut Greenland ApS, Savalimmiormiut isumaqatigiissitsiniartarnermik ingerlatsiviat Rajani/Rasmussen aqqutigalugu tuniniarneqarpoq, taassumalu Kalaallit Nunaanni nunanilu allani pisiumasinnaasut arlallit attaveqarfigisimavai.
Sermitsiaq aviisi allappoq.
Tunngavilersuerusunngitsoq
Ingerlatsiviup tupaallannartumik tuniniarneqalerneranut suna pissutanersoq ingerlatsiviup pisortaanerata Niels Thomsenip oqaaseqarfigiumanngilaa.
– Oqaaseqarsinnaanngilanga, Niels Thomsen Sermitsiamut oqarpoq.
Ingerlatsivik Halibut Greenland 2008-mi pilersinneqarpoq Ilulissanilu suliffissuaq 2010-mi ammarneqarluni. Piginnittut amerlanersaat tassaapput aalisartut, suliffissuarmut tunisisartut.
Kaaviaartitat qaffattut
Halibut Greenlandip kaaviiaartitai 2015-imi 201 millioner koruuniniit 2016-imi 223 millioner koruuninut amerleriarsimapput, sinneqartoorutilli 2015-imi 30 millioner koruuniniit 2016-imi 8 millioner koruuninut ikileriarsimallutik. Tamanna peqatigalugu piginnittunut iluanaarutisiat 2015-imi 20 millioner koruuniniit 2016-imi 5 millioner koruuninut ikileriarsimapput.
Halibut Greenlandip qanoq inissisimanera pillugu, Sermitsiaq aviisimi ullumi tallimanngornermi saqqummertumi paasisaqarfiginerusinnaavat. Aviisi uani pisiariuk: