Halibut Greenland sulisussaaleqinermik eqqugaaqqittoq
Ilulissani aalisakkanik tunisassiorfik namminersortoq, Halibut Greenland, suleqatigiiaanik nikittaartunik marlunnik sulisoqarsinnaangaluarluni ulluni makkunani suleqatigiiaanik ataasiinnarnik ingerlatitsivoq. Sulisussaaleqineq tamatumunnga pissutaavoq
Ilulissat Kangerluata sikkorinnera pissutaalluni aalisarfik timmut 25 kilometerit missaat angullugit tiffasitsigisumiittoq qimussimik aalisartunut ulluni makkunani suliassaaleqisitsinngilaq.
Tamanna illoqarfimmi aalisakkanik tunisassiorfiup aappaanut, tunisassiorfimmut namminersortumut Halibut Greenlandimut aamma ulapitsitsivoq
- Halibut Greenlandimi inunnik 20-inik suleqatissarsiorpugut.
Niels Thomsen Facebookimi quppernermini ataasinngormat taama allappoq.
- Sulisunik amigaateqarluta ujaasigaangatta soqutiginnittorpassuarnit saaffigineqartarpugut. Tassanilu putoq matuneqarallartarpoq, kisianni sapaatip-akunnera ataaseq imaluunniit marluk qaangiukkaangata tamatigungajak taakkua nutaat tusarfigeqqinneq ajorpagut, Niels Thomsen oqarpoq, nangillunilu:
- Suleqatigiiaat nikittaarlutik sulisut marluk atorlugit qalerallit piareerlugit tunisassiaralugit suliarisinnaangaluarpagut, kisianni maanna inuit 20-t missaannaat atorlugit ingerlavugut, suleqatigiinnik allanik inuttassarsisinnaannginnerput pissutigalugu, Niels Thomsen oqarpoq.
Qalerallit ilivitsuutillugit qerisittaraat
Halibut Greenlandip maanna qalerallit paperuiinnarlugit niaquiinnarlugillu eriteqattaarlugit tunisassiarigai Niels Thomsen oqaluttuarpoq.
- Aningaasanik annaasaqarnitsinnik tamanna kinguneqarpoq, tassami qalerallit tisariikkat tunisassiaralugit naleqarnerugamik, Niels Thomsen oqarpoq.
Halibut Greenland piffissami matumani 30-t missaani sulisoqarpoq, taakkunannga 24-t missaanniittut suliffeqarfiup tunisassiorfiani tigooraavianilu sulipput. Taakkunanngalu 30-nit sisamat filippineriupput.
Suliffeqarfik sulisunut inissiaateqarpoq, inissiat ataatsimik initallit arfiniliupput, ataatsimullu najugaqarfik 14-nik ineerartalik, taakkualu tamarmik inoqarput, taamaattumillu suliffeqarfik sulisunik illoqarfimmeersunik pisariaqartitsivoq.
Niels Thomseni oqarnera naapertorlugu, suliffeqarfiup siunissami nunanit allanit suliartortitaqartarnissani avaqqussinnaanngilaa.