Halibut Greenland akitsuutinut nutaanut aarlerisaarivoq

Siunnersuut nerrivimmit peersiuk!

Naalakkersuisut nutaamik akitsuusersuinissamik sinerissap qanittuani qaleralinniartunut eqquisussamik siunnersuuteqareersullu, Ilulissani aalisakkanik tunisassiorfimmit Halibut Greenlandimit taama kaammattuuteqarpoq.

Siunnersuut naapertorlugu tunisap nalingata 5 procentia akitsuutaassaaq.

- Inatsisissatut siunnersuut inuussutissarsiortunut, ulluinnarnilu aalisarnermik inuussutissarsiortunut annertuumik eqquisussaavoq, pisortaq Niels Thomsen Inatsisartunut ilaasortanut tamanut ammasumik allagaqarnermini taama naqissusiivoq.

Aningaasartuutit qaffatsissagai
Akitsuutissap nutaap sunniuteqarnissaa takussutissiariniarlugu kisitassamik tunisinermut aki kiilumut 20 koruuni aallaviagalugu saqqummiussaqarpoq:

• Umiatsiaararsorluni aalisartumut ataatsimut 20 tonsinik tulaassisartumut akitsuut 20.000 koruuninik naleqassaaq

• Angallatersortoq 150 tonsinik pisassaqarpat, ukiumut 150.000 koruuninik akitsuutinut akiliisassaaq

Eqquinerlorujussuassasoq
- Ersarippoq aalisartunut eqquinerlorujussuaannarani, aamma aqutsiveqarfinni assigiinngitsuni assigiinngitsunik eqquissooq. Oqartoqarsinnaangunarpoq kinaassusersiortoqartoq, aamma immikkoortitsisoqartoq, Niels Thomsen erseqqissaavoq.

Akitsuutip akit naapertorlugit akileraarutaasarnissaat, assersuutigalugu pisat annertussusaat pinnagit taamatut isummersornerminut tunngavilersuutigai.

Tamanna piffinni unammilleqatigiiffiusunut, taamatullu tunisinermi akit qaffasinnerusuni aalisartut allanit piffinniittunik annertunerusumik eqqugaanissaannik isumaqarpoq.

Nukillaarsaasoq
- Ukiuni kingullerni aalisarnerup iluani ineriartorneq pitsaasoq innarlerneqassappat illersorneqarsinnaanngilaq. Suliffinnik annaasaqarneq aningaasaqarnikkullu innarliineq pissaaq. Taamaattumik Inatsisartut partiivi eqqarsaqqittariaqarput, sinerissap qanittuani aalisarneq siuarsagassatut taaneqartoq maanna nukillaarsarneqalertutut isikkoqarmat, pisortaq erseqqissaavoq.

Akitsuutinut nutaanut tusarniaasoqarsimannginnera Niels Thomsenip aamma saniatigut isornartorsiorpaa.