GUX: Coronap nalaani misilitsinnerit

Kalaallit Nunaanni coronavirusip tunillaassoratarsinnaaneranut suli sillimaniartoqarpoq. Taamaammat GUX Qaqortoq aamma GUX Aasiaat misilitsinnissamut ukioq manna allatut pilersaarusiorput.

Misilitsinnissami nalileeqataasartut Danmarkimeersut nunatsinnut ukioq manna tikiseriaannaanngillat. Misilitsinnissamullu attaveqaatissat allaanerusut atornissaat aalajangerneqarsimavoq:

- Ilinniartut misilitsilerunik internet aqqutigalugu nalileeqataasussamik malinnaavigitinnissaq periarfissarigaat ilisimatinneqarput. Ilinniartut ilaat akuersipput, allalli taamaasiorusunngillat. Internet atorlugu nalileeqataasussamik toqqaanngitsut allatut aaqqiiviginiassavagut, GUX Qaqortumi rektori, Brian Alarik Johansen, ilisimatitsivoq.

Nalunaarut atuuttoq

Nunatsinni ilinniarnertuunngorniarfiit ilinniarfiillu coronap ajornartoortitsinerata nalaani allatut ittumik misilitsitsinissamut Naalakkersuisunit periarfissinneqarsimapput.

- Videokonferencemi atortartunik atortunik pisinikuuvugut, Danmarkimiit nalileeqataasussat attaveqarfigisinnaaniassagatsigit. Atuartitsissutini arlalinni ilinniartut misilitsissapput, Danmarkimiit nalileeqataasumik skypekkut attaveqarlutik, GUX Aasianni rektori, Dorthie Siegstad nassuiaavoq.

GUX Qaqortumi misilitsinnissat nalunaaqutaat allanngortinneqarsimapput. Misilitsitsinerit ullaakkut nalunaaqutaq 7.00 aallartittarsinnaapput, kingusinnerpaamik nalunaaqutaq 13.00 naammassillutik, nalileeqataasussat Danmarkimiittut piffissani tulluarnerusuni peqataatinneqarsinnaaniassammata. Misilitsinnissamut piareersarnissaq sivitsorneqarsimavoq, taamatullu atortutigut ajortooratarsinnaaneq sillimaffigineqarluni.

Toqqaannartumik aallakaatitsineq

Qaqortumi junip 26-ani 2020 allagartartaarnissaq coronamit aamma sunnerneqarpoq. Ilinniartut sulisullu kisimik tikilluaqqusaapput.

- Ilaqutaasut tamarmik peqataassappata inuit 300-t missaanniissaagut. Ajoraluartumillu taamaasiorsinnaanngilagut, Brian Alarik Johansen oqarpoq.

Allagartartaarneq ilaquttat peqataatinnagit ingerlanneqassaaq. Allagartartaarnerli Facebookikkut toqqaannartumik aallakaatinneqassalluni.

- Taamaasillutik peqataasinnaapput - ungasianiit, Brian Alarik Johansen oqarpoq.

Aasiaat juunip 23-ani 2020 allagartartaarnissamut pilersaarutit allaanerupput. Allagartartaarneq, oqalugiarnerit akissarsisitsinerillu silami ingerlanneqassapput.

- Silami inuit imminnut ungasinnerusinnaalluaramik, Dorthie Siegstad oqarpoq.

- Unnukkulli nereqatigiinnissamut pilersaarutinik marlunnik suliaqarsimavugut. Inuit amerlasuut ataatsimooqqissinnaalissappata nereqatigiinnermi ilaqutaasut peqataasinnaajumaarput. Ataatsimooqqusinnginnerli atortinneqaannassappat ilinniartut kisimik nereqatigiissapput. Taamaammat qaaqqusissutinik tunniussivugut, ersarissarlugu allanngortoqarsinnaasoq, GUX Aasianni rektor oqarpoq.