GUX Nuuk: Ullormi ataatsimi allagartartaartitsinerit arfinillit
GUX Nuuk juunip 26-ani allagartartaartitsinissaq eqimattanut arfinilinnut agguassallugu pilersaaruteqarpoq. Ilaqutaasut taamaasillutik peqataanissamut periarfissinneqassapput, Mikael Enggaard oqarpoq.
Qaqortumi Aasiannilu GUX-it assigalugit Nuummi misilitsitsinerit allagartartaarnerillu allatut pilersaarusiorneqarput.
GUX Nuummi allagartartaartitsinerit arfinilinnut eqimattanut agguassallugit siullerpaamik pilersaarusiorpoq.
- Ulloq takissamaaqaaq. Ilaqutaasulli allagartartaartitsinermi peqataanissaat pingaartissimavarput, ilaqutariinni siullermeertumik ilinniarnertuunngortuusinnaasarmata. Ilaqutariinnut ulloq pingaartuuvoq, Mikael Enggaard nassuiaavoq.
Nunatsinni coronavirusip tunillaassoqqilernissaanut aarlerinartoqarnera pissutigalugu Aasianni Qaqortumilu ilinniarnertuunngorniarfinni allagartartaarnerit allatut aamma pilersaarusiorneqarput.
- Allagartartaartut ilaqutaasullu tamarmiullutik ataatsimuussagaluarpata inuit 400-it missaanneeratarsinnaavugut. Taamaaliorsinnaanngilagut. Allagartartaartussalli agguarneratigut ilaqutaasut aamma inissaqartilerpagut, GUX Nuummi rektor oqaluttuarpoq.
Internetikkut misilitsinnerit
Misilitsittaarnerit aallarteriivipput. Mikael Enggaard oqaluttuarpoq misilitsinnerit Danmarkimiit nalilersueqataasumik, internetikkut attaveqaatikkut, peqataasoqarlutik ingerlanneqassapput.
Ilinniartut ilinniartitsisullu suli atuarfimmiittassapput, nalilersueqataasussarlu internetikkut attaveqarfigineqartassalluni.
- Isumalluarpugut. Periarfissat misilerarneqareersimapput, alimasissumillu ilinniartitsineq aamma misilittagaqarfigilaalereerparput, attaveqaqatigiiffik Zoom atorlugu ilinniartitsineq ingerlareermat, rektor Mikael Enggaard oqarpoq.
Danmarkimiit nunatsinnut suli killilersuisoqarpoq, tikittussallu akuerisat kisimik tikittarlutik. Taamaammat misilitsinnerni nalilersueqataasussat Danmarkimiit tikeriaannaanngillat.
Ilinniarnertuunngorniarfinnilli allaniit nalilersueqataasussaasut tikittarumaarput.