GUX-imi ilinniartut Nunatta siunissaa pillugu piviusulersaarummik filmiliortut

Kalaallit Nunaat pillugu aamma nunarsuarmioqataaneq pillugu Sisimiuni GUX-imi sulinititut aallartittoq, annertunerujussuanngorpoq.

Ilinniarnertuunngorniarfimmi ilinniartut pingasut filmimik pivisulersaarummik maanna suliaqaleruttorput, tassani politikerit nuimasut, inuusuttut qinersisartut kiisalu eqqumiitsuliortut aamma inuussutissarsiortut Kalaallit Nunaat nunarsuarmioqataaneranut tunngatillugu isummatik annippaat - kiisalu Kalaallit Nunaat namminersulivissinnaaneranut apeqqut akissuteqarfigaat.

Oqallitsitsineq
Ilinniartut suliartik Sisimiuni kulturip illorsuani Taseralimmi apriilip 27-ani saqqummiutissavaat, filmip piviusulersaarutip saniatigut aamma rapportiliussapput.

Aammalu Inatsisartuni partiit tamarmik, ilinniartut suliaannik oqallinnissamut peqataanissamut qaaqquneqarnerminnut ajunngitsumik qisuariaateqarsimapput.

Qulartut
- Piviusulersaarut suli piariinngilarput. Kisianni apersukkatta akornanni maanna assigiinngissuseq eqqarsarnarsereerpoq, inuusuttut qularput, politikerilli amerlasuut neriulluartupilussuupput, Kaaleeraq Møller Andersen erseqqissaavoq, taanna suliniummi siuttuuvoq.

Innuttaasut nunarsuarmioqataasut
Tamanna ilaatigut Inatsisartut siulittaasuata, Lars-Emil Johansenip (S), apersorneqarnerani takuneqarsinnaavoq, taassuma Nunatta siunissaa ima oqaatigaa:

- Kalaallit Nunaat namminersortoq takorloorpara aamma neriuutigaara, imminut pilersortoq, pigissaartoq, atugarissaartoq. Ilinniarluarsimasunik inulik, qaammaasarissaartoq - aamma silarsuarmioqataalluartoq, avammut ammasoq immunut mattutinngitsoq, piviusulersaarummi taanna oqarpoq.

Piviusulersaarutip ilamernga allaaserisap ataani takuuk