GUX-imi ilinniartut corona pillugu saqqummersitsisut
Eqqumiitsulianik saqqummersitsineq ilinniarnertuunngorniartunit ilinniartitsisuniillu takuneqarsinnaavoq. Coronavirus kingunerisaalu saqqummersitsinermi isumassarsiorfigineqarsimavoq.
GUX-imi eqqumiitsulianik takutitsinerup #aparttogether (ungasilluta ataatsimuussaagut, aaqq.) sammisaraa. Isumassarsiorfiusoq tassaavoq virusi isaannarmik takuneqarsinnaanngitsoq, piffissalli sivikitsup ingerlanerinnaani nunarsuup tamangajammi matuneranik kinguneqartitsisoq.
#Aparttogether isumassarsiorfiusoq Danmarkimeerpoq, coronavirusilu pillugu eqqumiitsuliarpassuit taama hashtagilerneqarsimallutik. Ilinniartut saqqummersitaat ateqarpoq "malugisat oqaatigiumasallu - COVID-19".
Virus pillugu ilinniartut misiginerat isummernerallu qalipakkani assilisanilu takuneqarsinnaapput. Virusip oqaatsinik, siornatigut tusarsimanngisatsinnik, soorlu innuttaaqataalluartuunermik, tunillaassortumik aamma tunillatsinnginnissamut illersuutinik ilinniartissimavaatigut.
- Ilinniartut naammassisaat pillugit tulluusimaaqaanga. Atortut isumassarsiallu pillugit killilerneqaratik sulipput, covid-19-ilu pillugu isummersornerat eqqarsaataallu saqqummerartut assigiinngiiaarluarlutik. Uanniit nersualaarneqarujussuarput, ilinniartitsisuat Nina Thomsen oqarpoq.
Ilinniartut ilaasa suliaminni ataqatigiinneq sammivaat, allalli covid-19-ip kingunerluutai pillugit eqqumiitsuliorsimallutik. Saqqummersitsineq ilinniartunit ilinniartitsisuniillu takuneqarsinnaavoq, covid-19 tunillaassuleratarsinnaanera pissutigalugu atuarfik allanut matoqqagallarmat. Sermitsiaq.AG immikkut akuerineqarsimavoq saqqummersitsisunik oqaloqateqarsinnaalersillugu.
Frida Larsen: Uanga qalipappara arnaq atisaqanngitsoq, inimini issiasoq. Qaammat arnaassutsimut ilisarnaatinneqartarpoq. Qalipakkami arnaq qiasimavoq, qalipataralu ateqarpoq "Værelsesfølelser" (Inimi misigissutsit, aaqq.) Misigissutsit soorlu annilaanganeq, aliatsaqqarujussuarneq kiserliornerlu mattussimanermi sakkortunerusutut issinnaasarput.
Arnatsiaq Rosing-Ingemann: Qalipagara ateqarpoq ”2020 Cancelled”. Takutippaa angalanissaq ukioq manna taamaatinneqartoq, Angalassanngilagut tunillatsinnginniassagatta, taamatullu covid-19 nunatsinnut angerlaatinnginniassagatsigu. Taamaammat angerlarsimavugut.
Nuunni Rosing Jakobsen: Anginerumaartunik ikkussuillunga eqqumiitsuliorpunga. Titartakkamma ikkussukkammalu takutippaat immitsinnut qanoq ungasitsigissanersugut. Pilersaarutaasimagaluarpoq ikkussuininni pisiniarfiup iluata ilusaanik ikkussuinissara, atortunilli amigaateqarsimavunga. Imminut unammillerniarlunga taama suliaqarpunga.
Aggu Christensen aamma Nino Baadh: Isaruaasat VR-it atorlugit eqqumiitsuliorpugut. Eqqumiitsuliarput digitalimik titartagaavoq, tassa isaruaasaqartinnani takuneqarsinnaanani. Titartarparput napparsimavik. Silataaniipput nakorsaq toqulu. Toqup coronavirus napparsimavimmut isertinniarsaraa, nakorsalli coronavirus ajattarpaa isertinnaveersaarlugu. Imminnut unammipput.
Casper Eliassen aamma Nikki-Aqqalu Madsen: Nunami isumassarsiorniarluta anivugut. Sissama sermimik quajaatinillu nassaarpugut. Assilisatta takutippaat mingutsitsineq nappaassuusoq ersinngitsoq, Issittumik kingaatsumik sequtseriartortoq. Siku aappoq, tassa aanaarpoq. Assip kingulliup takutippaa inuiaqatigiinni immitsinnut qanoq ataqatigiinnersugut. Qisuit ujaqqallu tamarmik atapput. Coronavirus akulerutissappat, inuiaqatigiillu tunillaassortoqarfiusut imminnut qanillivallaassappata, inuiaqatigiit tamarmiusut isamissapput.
Laila Møller: Nuna atorlugu eqqumiitsuliorpunga. Ujaqqat qalipatakka atorpakka. Tassa avissaaqqapput qalipanneqarnerminnili ataatsimuulerlutik, soorlu sammisarput #aparttogether taama isumaqartoq. Qalipaatit taarnerusut aningaasaatilissuartut isigineqarsinnaapput. Tassa pissaanermik atornerluineq aallaavigalugu aningaasaatilissuanngorsimasut. Taakku aaqqiissutissanik akikinnerusunik, immaqa pitsaanerpaajunngitsunik, toqqaasarput. Qalipaatilli qaamanerusut ajunngitsunik aaqqiissutissaatilinnik isumaqarput. Quppaqarpulli, tassa unammilligassaqarput. Eqqumiitsuliara tassaavoq RevoReal.
Minik Steenholdt: Pingasunik qalipaavunga. Qalipagaq siullermi takuneqarsinnaavoq imeq, tassa coronaviruseqanngikkallarmat ataatsimoornerput. Tunuliaqutaa qaamasuuvoq. Qalipakkap tulliani takuneqarsinnaavoq imeq avissaariartulersoq kuserninngorlutik. Tassa coronaviruseqarpoq, inuiaqatigiillu avissaariartulerput. Tunuliaqutaasoq tarrajuppoq ersinarlunilu. Ilutsinni aamma avissaartuuttoqarpoq, taamaammat qalipakkap eqqarsartaatsitsigut aamma qanoq innersugut takutippaa. Qalipakkami kingullermi takuneqarsinnaavoq kusernerit ataatsimooqqilersut. Tunuliaqutarli suli tarrajuppoq. Takutitsivoq allanngorsimasugut, ataatsimooqqilersugulli.
Jaakusaaq Sørensen: Uanga titartaavunga. Inuk paarnaarussaaqqavoq. Inuk taanna, tassa uanga, kisimiitsitaavoq mattussaaqqalluni, nuannaarporli. Takutippara kisimiikkaluarlunga nuannaartunga, tassa kisimiinnissaq, nammineq suliaqarnissaq nuannarigakku. Mattussaaqqaneq uannut nuannerpoq, iperagaasutullu misiginarluni. Suliara atserpara "Who is imprisoned?" (Kina paarnaarussaava, aaqq.) Kina mattussaava? Uanga allalluunniit?
Natuk Berthelsen: Suliara coronavirus pillugu ajunngitsumik isiginninneruvoq. Ataqatigiittoqarneranik oqaluttuarpoq. Soorlu asaqatigiittut, ikinngutigiit ilaqutariillu suli ataqatigiipput. Coronaviruseqaraluartoq suli asaqatigiittoqarpoq ataqatigiittoqarlunilu.
Karl Frederik Olsen: Suliara ateqarpoq ”Tragic Medicine”. Oqimaakujuttuuvoq coronallu nalaani pissutsinik piviusunik oqaluttuarluni. Qalipakkama teqeqquini tamani corona pillugu oqaluttuaaraqarpoq, piviusoq pillugu oqaluttuartunik. Suliffeqarfiit matusut. Nakorsat illersuuteqartariaqartut. Inuillu mattusimasut. Tassa piviusorsiorpoq, inuiaqatigiinnilu immikkuualuttut assigiinngitsut pillugit qalipataalluni.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...