GUX-imi ilinniarnertuunngorniartut silap pissusia pillugu suliumajunnaarniarput
Ilinniartut nunat tamalaaneersut silap pissusia pillugu tallimanngorpat suliumajunnaassapput. Nuummi GUX-imi ilinniarnertuunngorniartut tassunga peqataaniarput.
Nunarsuarmi illoqarfinni hunnorujulikkaaneersut ilinniartut silap pissusia pillugu tallimanngorpat suliumajunnaarpata, Nuummi GUX-imi ilinniarnertuunngorniartut peqataassapput.
Ilinniarnertuunngorniartut Amisuniit nalunaaqutaq aqqanermut qiteqquppat ingerlaaqatigiillutik aallartissapput.
- Silap pissusiata allanngoriartornera silaannaallu kiatsikkiartornera ukiuni qulikkaani ilisimareerparput. Silalli pissusiata ajalusoornerata qaangernissaanut politikkikkut siuttuusut qanoq iliuuseqarsimanngillat. Nunarsuarmi innuttaasut tamakkerlutik sakkortuumik eqqorneqassanngippata, ukiut qulit qaangiutsinnagit avatangiisinik paarsinerulluta inuulertariaqarpugut. Politikkikkut sumiginnaanerup silallu pissusiata allanngoriartornerata kingunerisaanik silap pissusia innuttaasunit pingaartinneqarnerulersimavoq, Iluuna Sørensen aamma Sascha Blidorf, Nuummi GUX-imi ilinniarnertuunngorniartut sinnerlugit allapput.
Silap pissusia inuusuttut akornanni ilungersunartutut isigineqarpoq
Suliniut Greta Thunbergimit sverigemeersumit aallartinneqarpoq taajuuserneqarsimalluni 'Skolstrejk för klimatet'. Suliniut maanna nunarsuarmi ilinniartunit tamanit atorneqarpoq FridaysForFuture-tullu taallugu anguniagaqatigiiffinngorsimalluni.
Anguniagaqarluni ilanngussuuffigineqartup siunertaraa Parisimi isumaqatigiissutip naammassineqarnissaa.
- Nunarsuarmi inuusuttut, qinersinerni siunissartik suli taasisinnaanngitsut, ilungersuuteqarput. Taamaammat - atugarissaarneq Kalaallit Nunaannilu akeqanngitsumik ilinniarsinnaaneq qujamasuutigigaluarlugu – ilinniartut atuarfimminniit anissapput aqqusinermilu ingerlaaqatigiissallutik tusarneqarnissartik anguniarlugu. Soorlumi Thunberg oqarpoq: Sooq atuarfimmi atuassaagut siunissarput pillugu, uffalu siunissarput arlaannaanilluunniit annanniarneqanngitsoq?
Naalagaaffeqatigiit iluanni suliumajunnaarnissat 20-t piareersarneqarsimapput ilaatigut Nuummi, Aarhusimi, Nykøbing Falsterimi, Esbjergimi, Svendborgimi, Københavnimi Thorshavnimilu. Ilinniartut Naalakkersuisut, Christiansborgip, kommuni allaffii illoqarfiillu qeqqani katersuutissapput.
Kalaallit Nunaat Parisimi isumaqatigiissummut ilanngunnikuunngilaq.