GSS Brugseni Jule Cupimi ajugaasoq
Assammik arsarluni unammiuaarnermi Brugseni Jule Cupimi, Nuummi Inussivimmi ingerlanneqartumi, GSS arnani angutini ajugaavoq.
Assammik arsarluni unaammiuaarnermi Nuummi Inussivimmi ingerlanneqartumi sapaatip-akunnerani matumani ajugaaniutivittoqarpoq.
Timersoqatigiiffik GSS marloriaammik ajugaavoq, unammiuaarnermi arnani angutinilu ajugaalluni.
- Angutit ajugaaniutivinnerat pissanganartuussasoq ilimagineqarsimavoq, unamminermi aallarniutaasumi unammisut 32-32-mik naligiiginnarsimammata, GSS-imeersoq Kristian Heilmann angutit ajugaaniutivinnerat pillugu tusagassiuutitigut nalunaarummi allappoq.
Kristian Heilmann oqaluttuarpoq, unammisut unammineq tamakkerlugu ingerlaqatigiilluarsimasut, GSS-ili siuaqqajuaannarsimasoq:
- Assammik arsartartorpassuit unammisunit marlunneersut arsarluarput. Unamminermili Marco Geisler immikkooruteqarpoq titarnerup avataaniit arlaleriaqaluni ajunngivissunik isertitseriartarluni kiisalu titarnermiittumut unammeqatiminullu arlaleriarluni ajunngivissumik tunniussisarluni.
Najaaja Lyberth takutitsilluarnerpaasoq
- Marco ajuutsitsinaveersaarnermi aamma arsarluarpoq unamminermilu aqqanilinnik isertitsilluni isertitaqarnerpaalluni, taamaalillunilu ajugaaniutivinnermi takutitsilluarnerpaatut toqqarneqarluni Brugsenimillu gavekortimik tunissuteqarfigineqarluni, Kristian Heilmann oqaluttuarpoq.
Arnat ajugaaniutivinneranni GSS aallaqqaammulli sukkasoorujussuarmik ingerlatsivoq, pingaartumillu GSS-imeersoq Najaaja Lyberth qiimmassimaarluarpoq unamminerullu aallartinneraniit naanissaanut torrallaasaqattaarluni.
- Najaaja Lyberth ajugaaniutivinnermi aamma takutitsilluarnerpaatut toqqagaavoq 18-ersuarnillu isertitsilluni isertitsinerpaajulluni, Kristian Heilmann oqaluttuarpoq.