GSS assammik arsarlutik pissartanngortut
Nunatsinni assammik arsarluni pissartanngorniutivinnermi GSS pissartanngoqqipput.
GSS Nuummeersut nunatsinni assammik arsarlutik pissartanngorniutivinnermi ippassaq ajugaapput.
GSS illoqarfeqatigisaminnut NÛK-mut unammipput. NÛK arlaleriarluni siuarniartaraluarpoq, iluatsinngitsumilli.
Unamminermi minutsit 30-t siulliit unammisut naligiilluinnarput, unamminermilu muminnermi suli kikkut ajugaasinnaanerat nalileruminaalluni. Unamminerup muminnerani 14-13-imik isertitsisoqarsimasoq GSS siuaqqalaarpoq, unamminermilu siullermi NÛK uteriapallattarnermini isaatitsinerusimalluni.
Unamminerulli naajartulernerani GSS-ip siuaqqanini målinik arfineq-pingasunik annertusivaa. Taamaasilluni GSS ajugaavoq isertitsinerit 32-24-iullutik.
Bronzennanniunneq pissanganarluinnartoq
Pissartanngorniutivinnerit ingerlanneqarneranni unammineq Agqissiaq Maniitsumeersoq aamma Nagdlunnguaq Ilulissaneersoq pissanganarluinnartumik unammipput.
Nagdlunnguaq siulliulluni isertitsivoq unamminerullu aallartinnerani siuarnerulaarluni. Unammisulli akunnerup affaani siullermi naligiilluinnarlutik unammipput, paarlakaallutillu siuartarlutik. Nagdlunnguup illersuinermini periuseraa qatanngutigiit Kreutzmannikkut, Angutimmarik aamma Akutaaneq Kreutzmann assersimaqqissaarlugit, taamaasillutik isertitseriarnissamut periarfissalutsillugit.
Unamminerup muminnerani Nagdlunnguaq siuaqqavoq 15-16-imik isertitsisoqareersoq.
Unamminerup naallugu pissanganartoqarpoq. Unamminerup minutsiani kingullerpaamik Ilulissaneersut isertitsissagunik unammisut naligiittussanngoraluartut isertitseriarneq iluatsinngitsoorpaat. Taamaasillutik Maniitsumeersut Agqissiaq pissartanngorniutivinnermi 3-nngorput bronzennallutillu. Unamminerup inerneraa 30-29.
Norsaq HC pissartanngorniutivinnermi normu 5-inngortoq, Akuleriit normu 6-itut inissipput.
Pissartanngorniutivinnermit assit allaaserisap qulaani takukkit.