Naqqiissut: Ilanngutassiami siusinnerusukkut allassimavoq, Juaaka Lyberth kommunalbestyrelsimi IA-p gruppiani siulittaasuusoq. Tamanna eqqortuunngilaq, kukkusimanerlu iluarsineqarluni.

Atuakkiortup inatsisilerituullu Morten Engbergip kommunit minnerunngitsumillu nakkutilliisut inatsisitigut malittarisassaat pillugit ilinniutitut atuakkiamini nutaami nakkutilliisut Nakkutilliisuutitallu inissaqartitsiniarluni suliamik suliarinnissimanerat sakkortuumik isornartorsiorpaa.

Kommuneqarfik Sermersuumi borgmesteri Avaaraq S. Olsen (IA) suliamut oqaaseqarusunngilaq, parteeqataali kommunalbestyrelsimilu IA sinnerlugu oqaaseqartartoq Juaaka Lyberth oqaaseqarusussimavoq.

Taassuma oqaatigaa, Nakkutilliisuutitat nakkutilliisullu isornartorsiorneqarnerisa Kommuneqarfik Sermersooq suliami pinngitsuutikkaat, kommunimi sakkortuumik isornartorsiorneqartarsimammat.

Morten Engbergip atuakkiamini ilaatigut nalilerpaa, Nakkutilliisuutitat Kommuneqarfik Sermersuup inissaqartitsiniarluni suliaanik atorunnaarsitsinissamut pisinnaatitaaffeqanngitsut. Nakkutilliisuutitat aamma aalajangiinerminni borgmesterimik immikkut isornartorsiuillutik oqaaseqarsinnaatitaannginnerarpai.

Siusinnerusukkut tamanna uparuartarsimagaat

Juaaka Lyberth tamanna pillugu imatut oqarpoq:

- Inerniuliunneqarsimasut taakku IA-p gruppiata isumaanut naapertuulluarput. Tamanna aamma oqaaseqartartutut mianersortumik imatut oqaatigisimavara:  ”Nakkutilliisuutitat suliassaqarfiit ilaannut tunngatillugit pisinnaatitaaffimminnik/piginnaatitaaffimminnik qaangiisimasutut isumaqarfigingaluarlugit, kommunalbestyrelsip Nakkutiilliisuutitat uparuaataat isornartorsiutaallu tusaatissatut tigusimavai aaqqiiffigisimallugillu", Juaaka Lyberth Sermitsiaq.AG-mut allakkatigut taamatut oqaaseqarpoq

Taassuma inissaqartitsiniarluni suliami politikkikkut akisussaaffiliisoqarnissaa pillugu aggustimi kommunalbestyrelsi ataatsimiissuteqarmat IA-mi Naleqqamilu ilaasortat sinnerlugit oqaaseqaatigisimasani innersuussutigaa. 

Juaaka Lyberthip erseqqissaassutigaa, Sermitsiaq.AG-p inatsisilerinermi atuagaq pillugu saqqummiussaa kisiat atuarsimallugu, tassa atuagaq atuarsimanangu oqaatigaa.

- Naliliineq iluumuussappat assuarnartoqassasoq

Morten Engbergilli suliamik naliliisimanera ilumuussappat annertuumik assuarnartoassasoq Juaaka Lyberth isumaqarpoq:

- Nakkutilliisut nakkutilliisuutitallu kommuninik nakkutiginnittussat - inatsisit malittarisassallu malillugit suliaqartussat pisinnaatitaaffimminnik qaangiisimanerat assuarnarpoq.

- Isumaqarpungali immitsinnut tikkuartuunnissamut piffissaq atussanngikkipput, ataatsimoorlutali kommunitsinni innuttaasunut iluaqutaasussanik politikkikkut aaqqiissutissarsiornermut atussagipput, najukkami politikkeri oqarpoq.

Periuserineqarsimasoq nalilersimanngikkaa

Morten Engbergip Sermitsiaq.AG-mut erseqqissaassutigisimavaa, Kommuneqarfik Sermersuup namminersortut inissiaataannik attartoriarluni amigartooruteqartumik innuttaasunut attartortitseqqiisarsimanera inatsisinut naapertuunnersoq isummerfigisimanagu. Morten Engbergip nakkutilliisut Nakkutilliisuutitgallu suliamik suliarinnissimanerat isornartorsiorsimavaa.

Kommuneqarfik Sermersuumi inissaqartitsiniarluni suliami, kommuni aamma Naalakkersuisut nakkutilliisui tamarmik immikkut eqqartuussissuserisumik ikiorteqarnerminni aningaasarpassuarnik atuisimapput.