Grønvold: Ajuusaarlunilu utoqqatserpoq

Peter Grønvold Samuelsen Namminersorlutik Oqartussat ingerlatseqatigiiffiutaanni KNI A/S-imi ukiuni arfineq-pingasuni pisortaanertut atorfeqareerluni, ataasinngormat atorfimmini tunuarniarluni aalajangerpoq. Tamanna ingerlatseqatigiiffiup siulersuisuisa siulittaasuat Lars Borris Pedersen tusagassiorfinnut nalunaaruteqarnermi oqaatigaa.

Pisortap tunuarnera pillugu nalunaarutiginnittoqariitsiartoq, sulisut Peter Grønvold Samuelsen politiinut, Sermitsiaq.AG-p saqqummiuppaa.

Unnerluussutaasut

Sermitsiaq.AG-p Peter Grønvold Samuelsen allakkatigut unnerluussutigineqartut uku qanoq isumaqarfiginerai aperisimava:

Sulisuusimasut arlallit Sermitsiaq.AG-mut oqaatigaa, assat tujuuluisa iluatigut pukusuaniit tunuatigut ammut tagiuttarsimagit. Taamatut unnerluutigineqarnerit qanoq isumaqarfigaajuk?

Arnart arlallit killissat qaangerlugu oqaaseqartarsimasutit, arnap taassuma appaamilu/uimilu atoqatigiittarnerannik apersuisarsimanerarpaatsit. Taamatut unnerluutigineaarnerit qanoq isumaqarfigaajuk?

Peter Grønvold Samuelsen ataasinngornermi unnulersoq Sermitsiaq.AG-mut akissuteqarluni allappoq:

- Aallaqqaasiutigalugu erseqqissassavara suliffeqarfimmi sulisunik killissamik qaangiilluni qaninnguuiniartarneq nikassaanerillu akerlerigakkit. Paarlattuanimmi sulisut pisortaqatigisimasakkalu erseqqissaavigiuarsimavakka suliffeqarfiup iluani immitsinnut ataqqeqatigiittussaasugut, inuullu kialluunniit imminiussusianik
innarliiniartussaanngitsugut.

- Ajuusaarlungalu utoqqatserpunga kimulluunniit killissaanik qaangiillunga innimiilliorfiginnissimassaguma pissusilersornikkut oqaatigisimasakkulluunniit.

Oqaatsit "ajuusaarlungalu" "utoqqatserpunga" Peter Grønvold Samuelseip naqinnerit silittuutillugit Sernitsiaq.AG-mut mailimini erseqqissaatigai.

Inimmiilliorluni pissuseqartarneraaneq akerlilerpaa

Erseqqissaatigaa nammineerlunga paasinninnera ”inuttullu suleqatinnut pissuseqarninni killissaanik qaangiisumik qaninniarnermik siunertaqanngisaannarsimagama”.

Ilanngullugu aamma oqaatigaa, ”suleqatiminut suliffimmi suliffiulluunniit avataani attaveqaatitigut attaveqarniarsimanngisaannarluni, qaninniarnermik siunertalimmik”.

- Suliffigisimasanni toqqissisimaneq inuttullu qanilaarneq atorpara. Sulifigisimasanni arnat angutillu ilaanni tuiisigut attorlugit ilassisarsimavakka. Tamanna naliginnaasuuvoq, allatullu isumaqartinneqarani, taamaallaat inussiarnisaarnermik. Aamma illaqatigiittarneq atugaasorujussuuvoq. Oqaluttuat nuannersut suliffimmi unikaallassimaarnermi nerrivik kaajallallugu annissorneqartarput, tamanna suliffeqarfippassuarni atugaavoq, Peter Grønvold Samuelsen allappoq.

Kanngunarsaanissaq siunertarinngikkaa

KNI-mi pisortaanerup ilanngullugu oqaatigaa, kimilluunniit kanngunarsaanissamik siunertaqanngisaarnarsimalluni.

- Tamakku ilaanni quianartussarsiornerit tupigusuallatsitsiniaqattaarnerit pisarput. Oqaatsit ilaanni oqaluttuallu annissorneqartut kinguaassiutilerinermut tunngasuusinnaasarput, arnat angutillu oqaasertalersortagaat. Uangali oqallinnerni taama ittuni peqataasimaguma oqarsimagumaluunniit inunnut ataasiakkaanut tunngatitaasimanngisaannarput. Taamatulli misigisimatitsisimassagaluaruma assut ajuusaarutigaara taamatullu misigisimasoq utoqqatserfigalugu. Suleqatinnummi innimiilliornissaq siunertarinngisaannarsimavara, skriver Peter Grønvold Samuelsen, KNI-mi sulisut suliffimminnik naammagisimaarinninnerat pillugu misissuisoqartarnissaanik nammineq siunnersuuteqarsimalluni, misissusarnertigullu takuneqarsinnaasoq sulisut suliffimminnik sulisitsisuminnillu naammagisimaarinninnerat qaffasittorujussuusoq pillugu oqaaseqartoq allappoq.

Ilanngullugu ilisimatitsissutigaa, ullumili ingerlatseqatigiiffimmi suliunnaareersimalluni, siulersuisut siulittaasuat Lars Borris Pedersen nalunaaruteqaraluartoq, martsip qaammataata naanerani pisortaaneq suliunnaarniartoq.

Sexisme pissuserissaarfiusumillu quianartorsiortarnerit

- Kingullertigut suliffeqarfigisimasanni suliniutigitilerlugu aallartissimasama ilagaat ukiorpassuarni suliffeqarfiit iluini, suleqatigiinnermi ileqqulersuutaasartut nalitsinnut tulluarsassallugit, ilaatigut makku eqqarsaatigalugit: Sexisme, torersumik oqaloqatigiinnerit, pissuserissaarfiusumik quianartorsiortarnerit, oqaasertalersueriaatsit igutsinerillu, Sermitsiaq.AG-mut maileq naggaserlugu allappoq.