Skip to main content

Grønlandsbankip aningaaserivini umiatsiaararsorlutik aalisartunut ikersilaarpaa

Grønlandsbanki umiatsiaararsorlutik aalisartooreersut ilaannut, aningaasaqarnikkut aningaaseriviup piumasaqaataanik naammassinnittunut taarsigassarsisitsinissamut piareeqqavoq. Tamatumunnga Naalakkersuisup Jens Immanuelsenip nalunaarutaa pissutaavoq, aningaaserivik taamatut ilisimatitsivoq

Grønlandsbankimi pisortaanerup Martin Kviesgaardip, Jens Immanuelsenip umiatsiaararsorluni nungusaataanngitsumik aalisartoqalernissaa anguniarlugu iliuuseqartoqarniarneranik ippassaq Sermitsiaq.AG-mut nalunaarutaa soqutigalugu atuarsimava.

- Aalisarnermut Naalakkersuisup Jens Immanuelsenip aalisarnermut akuersissutit nutaat unitsinneqarnissai aamma pisassiissuteqartarnerup piujuaannartussamik tunngavilimmik ingerlanneqarnissaa pillugit oqaaseqaatai atuarpagut. Taamaalilluta piujuaannartitsisumik ingerlatsisoqarnissaanik kajumissaaruterput tusaaneqartutut isigaarput, aningaaserivimmi pisortaaneq Martin Kviesgaard tusagassiorfinnut nalunaaruteqarnermini oqarpoq.

- Taamaammat Naalakkersuisut aalisartut amerlavallaarneri annikillisarniarlugit aalisarnerup nungusaataanngitsumik tunngaveqarluni ingerlanneqarnissaanik siunertaqarlutik iliuuseqarnissaat qilanaaraarput, taanna oqarpoq. 

Grønlandsbankip umiatsiaarsorlutik aalisartunut aningaasaliissuteqartarnerminik unitsitsilluinnarniarluni oqaaseqaateqarneranit ullualunnguit qaangiuttut Naalakkersuisut taamatut nalunaaruteqarput. Aningaaserivik sullitaminik annaasaqassangaluaruniluunniit taamatut nalunaaruteqarsimavoq.

Aningaasaliinissamut ammaassineq 

- Naalakkersuisut aalisartut ikilisarnissaannut aamma pisassiissutinik aalajangersaasarnissamut isumaqataanerat piujuaannartussamik ingerlatsisoqarnissaanut erseqqissaataavoq. Oqaatsillu taaneqartut tunngavigalugit aningaaserivimmi maannakkut inuussutissarsiorlutik aalisartunut nalinginnaasumik aningaasaliinissarput ammarparput. Aalisartunngorniartunut aningaasaliineq suli matoqqassaaq, tamannalu Jens Emanuelsenip oqaaseqarneranut tulluartipparput, aningaaserivimmi pisortaq Martin Kviesgaard oqarpoq. 

Martin Kviesgaardip, Karl-Kristian Krusep aningaaseriviup aalajangernera “politikkikkut akulerunnertut” taallugu oqaaseqarnerata malitsigisaanik aningaaseriviup oqaatsiminik allanngortitsineranut sunniuteqarsimannginnerarpaa.

- Soorunami aningaaseriviup isummaminik annissinerata isornartorsiorneqarnera aamma politikkikkut oqaaseqartartup

Karl-Kristian Krusep isornartorsiuinera tusaavarput, Martin Kviesgaard oqarpoq. 

Aningaaseriviup aalajangernera sisamanngormat partiinit tamangajalluinnarnit oqaaseqarfigineqarpoq. Karl-Kristian Kruse oqaaseqartunit siullersaavoq, kingunitsiannguatigut Partii Naleqqamit, Demokraatinit IA-millu qisuariartoqarpoq.

Sammisaq malinnaaffigiuk qulequtaq una aqqutigalugu: Umiatsiaararsorluni aalisarneq

- Aalisartut amerlavallaarput aalisakkallu ikippallaarlutik, tamanna maannakkut aaqqissuussinerup ajoqutigivaa, KNAPK-p aamma tamanna oqaatigigaa tusarparput. Ukiunilu kingullerni aalisartunut atortussanik aningaasaliinikunut tamanna aamma ajoqutaasimavoq. Aalisartummi naatsorsuutiginikuuaat aalisarneq nungusaataanngitsumik ingerlanneqassasoq, aamma piujuaannartussamik tunngaveqanngitsumik pisassiissuteqartarnerit aalisalerlaallu amerlavallaarnerat pissutaallutik aalisartut

isertitaqarnissamut tunngavimminnik nungusaasoqasoqannginnissaa naatsorsuutigisimagaluarpaat. Ajoraluartumik nunap iluani aalisarneq maannakkut ajalusooriartorpoq, aningaaserivimmi pisortaq Martin Kviesgaard oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER