aningaasaqarneq
Grønlandsbanki aningaasarivilitsiattut inisseqqittoq
Grønlandsbanki ukioq manna kunngeqarfinni tutsuiviginarnerpaatut nalilersuinermi qaffasinnerpaatut inisseqqippoq. Qaffasinnerpaatulli inisseqqissimaneq annertuumik nuannaarutigineqarpallaanngilaq. "Qaffasinnerpaatut inissisimanissaq anguniangarinngilaput", Martin Kviesgaard oqarpoq.
Grønlandsbanki Kunngeqarfik Danmarkimi tutsuiginarnersaavoq.
Aningaaserivinnik ilisimatusartup Johannes Raaballep qanittumi misissuisimanerani saqqummiunneqaqqammersumi erserpoq.
Misissuinermi aningaasaateqarfiit akiliisinnaassuseqarnerannik misissuinerit ingerlanneqarput. Suliffeqarfiit pingisaasa naleqassusaat annertuneruppat aningaasaateqarfiup akiliisinnaassusaa annertunerussaaq.
Grønlandsbanki qaffasinnerpaasoq
Grønlandsbankip 10,56-imik akiliisinnaassuseqarluni qaffasinnerpaavoq. Aningaaserivik taamaasilluni tullersortiminit Lån og Spar Bankim 6,18-mik akiliisinnaassuseqartumit siuttuunerungaatsiarpoq. Akiliisinnaassutsip minnerpaamik 4-miinnissaa Johannes Raaballe innersuussutigaa.
Aamma atuaruk: Grønlandsbanki aningaasanik amerlanerusunik atukkiisoq
Naak qaffasinnerpaatut inissisimangaluartik aningaaseriviup pisortaanerata Martin Kviesgaardi pingaartippallaanngilaa. Killormuanilli pisoq sunnertiffigivallaanngilaa.
- Aningaaserivittut tatigineqarnissarput anguniangaraarput, tamannalu pingaarnersaavoq, taamatulli misissuinermit qaffasinnerpaatut inissisimanissaqarput anguniangarinagu. Pingaartinnerpaavarpulli sullitagut peqatigalugit aningaaseriviup ineriartortinneqartuartarnissaa, Martin Kviesgaard Sermitsiaq.AG-mut oqarpoq.
Aamma atuaruk: Misissuineq: Grønlandsbanken ingerlalluartutut nalilerneqartoq
Inuiaqatigiit aningaasarsiorluarnerisa nalaani aningaasaliiffgisinnaasatsinnut tapiissuteqartarnerit aningaaserivimmit immikkut isiginiarneqarsimasut, aningaaserivimmi pisortaaneq isumaqarpoq.
Unammilligassarpassuaqanngitsut
- Aningaasarsiorluarnerit ullumikkutut ingerlanerisa nalaani Kalaallit Nunaanut aningaasaliissuteqartunut peqataasariaqarpugut. Aningaasarsiornerillu ingerlanerlunnerisa nalaani, kunngeqarfinni aningaaseriviit akornanni takuneqartartutut unittuunnginnissaq aamma pingaaruteqarpoq, Martin Kviesgaard oqaluttuarpoq.
- Nukittuutut eqaatsutulli inissisimassagutt ingerlalluartoqartillugu ineriartortitsinermi peqataasinnaaneq ingerlanerluffimmilu eqaatsuunissaq tunngaviusoq oqaatigineqarsinnaavoq.
Kalaallit Nunaani ingerlalluartoq
Martin Kviesgaard aallaavigalugu Kalaallit Nunaat tunngaviusumik inatsimmi sanngiitsutut inissisimatinnerarneqartarpoq. Pisortaanerli aallaavigalugu misissuinermilu Grønlandsbankip qaffasinnerpaatut inissisimanera tamatumunnga killormorluinnaanik takussutissaanerarpaa.
- Inuiaqatigiinnit takussutissaavugut. Innuussutissarsiornernimi atuisartugut namminersortulluunniit atuisartugut arlallit inissisimalluarput. Taakkuli aningaaseriviup nukittujuneranut sunniuteqangaatsiarput. Kalaallit Nunaatalu tunngaviusumik inatsimmi inissisimanerlungaaneq atuisartinnit takusinnaanngilarput. Taamatummi inissisimangaluarutta misissuinermi taama qaffasitsigisumik inissisimassanngikkaluarpugut, Martin Kviesgaard oqarpoq, piffissamilu inuiaqatigiit aningaasarsiorluarnerisa nalaani aningaaseriviup inissisimalluarneranut pissutaasoq naggattigut tikkuarpaa.
- Ukioq mannalu ilaatigut aalisarnerup Nunattalu karsiata inissisimalluarnerinut pissutaaqataapput. Tamannalu soorunami aningaaserivimmut sunniuteqanngitsuunngilaq, aningaaserivimmi Grønlandsbankimi pisortaaneq oqarpoq.