ukiup sisamararterutaanut naatsorsuutit
Grønlandsbanki aningaasanik amerlanerusunik atukkiisoq
Grønlandsbankip ukioq nutaaq aallartilluarpaa. Tamanna ukiup sisamararterutaanut naatsorsuutiini qaffariaatit malunnarluartut takutissinnaallugit akileraartinnani 38,2 mio. koruuniusut.
2015-mi piffissap imaasinerani aningaaserivik akileraartinnani 21,5 mio koruuninikj angusaqarsimavoq. 17 mio koruuninillu angusarissaarnerusimaneq marlunnik nassuiaatissaqartoq, bankip ukiup sisamararterutaanut naatsorsuutaani takuneqarsinnaavoq.
Pappiaqqat aningaasanik nalillit erniortut
Pappialat nalillit iluini nalit nalimmassarnerini pitsanngoriaatit 10,4 mio koruunit pissarsiarineqarput, nalitigullu nalimmassaanerit aammalu nalikilliliinerit pitinnagit angusat 6,1 mio koruuninik qaffariarsimallutik.
Bankimi pisortaanerup Martin Kviesgaardip iluarisimaarinnini, paasissutissiaraa. Taassuma maluginiarsimavaa, sullitat suli amerliartuinnarnerat, soorlu tamanna taarsigassarsisitsinerit 122,1 mio. kr.-nik qaffannerisigut takuneqarsinnaasoq.
Ukioq manna annertujaamik ilinniartitsineq qaraasiatigullu atortut aningaasaliiffigineqarniartut, aammalu ukiuni 50-ni nalliuttorsiorneq malunnartinniarlugu assigiinnitsunik pissussaqarumaartoq, aningaaseriviup paasissutissiaraa.
Ukiumoortumik naatsorsuutinut ilimagisat allanngortinneqanngitsut
Nalinik nalimmassaanerit nalikilliliinnerillu pitinnagit ukiumi 125 – 145 mio koruuninik angusaqarnissaq naatsorsuutigineqarpoq.