Grønlandsbanken: Innuttaasut MitID-mik atuilernissartik isumagisussaavaat
Grønlandsbankenimit innuttaasunut kaammattuutigineqarpoq, novembarip aallaqqaataa nallertinnagut Mit ID-mik ersitseqqullugit, pilersitsinngikkunimmi annertuunik unammillernartoqartitsilersinnaapput.
Novembarip aallaqqaataaniit kiffartuussivik netbankimut mobilbankemulluunniit isernissamut atorneqarsinnaajunnaassaaq. Taamaammat innuttaasut Mit ID-mik suli pilersitsisimanngitsut, aningaasanik nuussiinnartarusukkunik qanorlu aningaasaateqarnerminnik takunnittaannarusukkunik pilersitsinissaat pisariaqarpoq, Grønlandsbankenimit ilisimatitsissutigineqarpoq.
Innuttaasut novembarip aallaqqaataa nallertinnagut MitID-eqalersimanngitsut netbankimi kalaallisut ilitsersuummik atuisinnaajunnaarsinnaapput.
Mitid.dk-mi aamma ilitsersuuteqarpoq, taannali danskisuinnaq allassimalluni.
Grønlandsbankenimit oqaatigineqarpoq, inuppassuaqartoq suli MitID-eqalersimanngitsunik. Taakku ilarpassui MitID-mik atuisinnaalertinnatik kinaassutsiminnut uppernarsaammik innuttaasunut kiffartuussivinnut assigisinaannulluunniit saaffiginneqqaartussaapput.
Sanilerisat ilaquttallu
Grønlandsbankenimit kommunini ataasiakkaanki innuttaasunut kiffartuussivimmut saaffiginneqqusissutit pingasunngornermi nassiussuunneqarput. Illoqarfinni mikinerusuni nunaqarfinnilu innuttaasut najukkaminni kiffartuussivimmut saaffiginnissapput.
Novemabarip aallaqqaataaniit aamma MitID-eqanngikkaanni internettikkut pisiniartoqarsinnaajunnaassaaq.
- Tusassimik immiiniarneq imaluunniit Air Greenlandimut bilitsimik pisiniarneq, MitID-eqalersimanngikkaanni ajornarsinnaavoq, taamaammat pissarsiariniarnissaa piffissanngorpoq, Grønlandsbankenimi attaveqartarnermut nittartaassisarnermullu pisortaq Peter Fleischer Rex nassuiaavoq:
- Tamanna Kalaallit Nunaanni innuttaasunut tamanut anngukkusupparput.
Kikkut tamarmik MitID-eqalernissamut imminnut ikioqatigiinnissaat pingaaruteqarpoq, Peter Fleischer Rex innuttaasut ilaquttaminnut, sanilerisaminnut allanulluunniit teknikkimik nutaamik paasiuminaatitsisunut ikiuuttarnissaaannik kaammattuuteqartoq oqarpoq.
Grønlandsbankenimit oqaatigineqarpoq, inuit illoqarfiit annersaasa avataanni najugaqartut tassaanerusut suli MitID-qalersimanngitsut. Illoqarfinni Grønlandsbankenimit immikkoortortaqarfeqartuni innuttaasut amerlanersaat MitID-qalereersimapput.