Grønlandsbanken: Eqqaamallugu soraarnerussutisiaqalernissannut katersatit naatsorsortissagakkit
Maanna nalunarunnaareerpoq S.I.K.-p soraarnerussutisiaqalernissamut katersiviata SISA-p innuttaasut namminneq soraarnerussutisiaqalernissaminnut katersisimanngitsut, taamaammallu inatsit malillugu pisortanit katersissunneqartut aningaasaatat isumagisussanngorai
Suna tamarmi aallartippoq S.I.K.-p 1. juli 1999-mi ilaasortami aammalu ilaasortarinngikkaluarlugit isumaqatigiinniussuttakkami soraarnerussutisiaqalernissamut katersisussaatitaalersut aningaasaataat isumagisussanngormagit.
Taamaattorli maanna S.I.K.-p soraarnerussutisiaqalernissamut aningaasaateqarfia anginerujussuanngortussanngorpoq, tassami inunnit utoqqalinissaminnut inatsit malillugu sipaagaqarsimanngitsunut Namminersorlutik Oqartussat akileraarutitigut katersisitsinerani ilaatinneqartut aningaasaataat kimit aqunneqassanersut suliariumannittussarsiuussinermi SISA ajugaammat oorillu katersortitat isumagisussanngorlugit, Sermitsiaq allappoq.
Qanorluunniit aaqqissuussineq isumaqataaffigigaluaraanni isumaqataaffiginngikkaluaraanniluunniit, inatsisit malillugit aningaasarsianit procentit aalajangersimasut SISA-mut nakkakaatinneqartussanngorput, inuttut nammineq aalajangikkamik soraarnerussutisiaqalernissamut katersukkat ileqqaarivimmut allamut imaluunniit aningaaserivimmut katersanik taamaattunik ingerlatsinissamut akuerisaasumut isumagisassanngortissimanngikkaanni.
Grønlandsbanken utoqqalinissamut ileqqaagaqarnissamik Qimatut pensionimik taasamik aaqqissuussaqartoq neqeroortitsinermi peqataasimasinnaagaluarluni peqataannginnissaminik toqqaasimavoq:
- Nalilersimavarput aningaasartuutit suliallu pisariussusia annertuallaassasut, taamaammat toqqarsimavarput neqeroortitsinermut peqataaniarnata, Grønlandsbankenimi sullissisut pisortaat Jesper Malling Sørensen Sermitsiamut nassuiaavoq.
Allaaserineqartoq tamakkiisumik Sermitsiami atuaruk. Aviisi uani pisiarineqarsinnaavoq: