Grønlandsbanken: Ajorpallaanngitsumik angusaqassaagut
Grønlandsbanken 80 aamma 120 millioner koruunit akornanni ukiumut angusaqartussatut naatsorsuisimavoq. Coronalli ajornartorsiortitsineranit aningaaserivik naatsorsuutigisamit annikinnerusumik sunnerneqartussaammat, 100 millioner koruuninit 120 millioner koruunit angullugit angusaqarnissamut allanngortinneqarpoq.
Grønlandsbankip fondbørsimiit nalunaarut ullumi ataasinngornermi nassiussaa naapertorlugu, Grønlandbankimi naatsorsuutigineqarpoq, coronap ajornartorsiortitsinera aningaaseriviup ukioq manna akileraarutit peereerlugit angusassaanut sunniutikinnerussasoq.
- Aningaaseriviup pappialaatai nalillit ulorianartorsiortinneqarnerisa annikillinerat, ukioq manna ingerlatsinerup ineriartornera aamma aningaaseriviup suliarisimasaasa misissorneqarnerat tunngavigalugit, naatsorsuutigineqarsinnaavoq angusassatut missingiussat suli annikinnerussasut, aningaaserivik ilisimatitsivoq.
Ikiorsiissutit
-Aningaasanut pisassanut ajortumik sunniutaasinnaasut, ilaatigut takornariartitsisartunut suliffeqarfinnullu allanut ikiorsiissutit tunngavigalugit annikinnerusussatut nalilerneqartut, Kalaallit Nunaanni annikinnerusumik sunniuteqassapput. Peqatigitillugu suliffeqarfiit arlallit pitsaasumik ineriartorput, soorlu aamma inissiaatileqatigiiffiit namminersortut sunnerneqarsimanngitsut, aningaaserivik tusagassiorfinnut nalunaaruteqarnermi erseqqissaavoq.
Grønlandsbankip unammillertaa - BankNordik - aamma nalunaaruteqarsimavoq, ukiup qaammataani pingasuni siullerni, coronap ajornartorsiortitsinera aallatimmat naatsorsuutigisamit pitsaanerusumik ukioq mana angusaqartoqassasoq.