Grønlandsbanken qaammatini siullerni pingasuni angusaqarluartoq
Grønlandsbanken 2021-mi qaammatini siullerni pingasuni angusaqarluarsimavoq, siorna piffissap taamaalineranit marloriaataat sinnerlugit angusaqarsimalluni.
Aningaaserivik 2021-mi qaammatini siullerni pingasuni akileraarutit suli peernagit 40,2 millioner koruuninik angusaqarsimavoq, 2020-mi Covid-19-ip tuniluunneranit sunnerneqangaatsiarsimalluni 16 millioner koruuninik angusaqarsimalluni.
GrønlandsBanken tusagassiorfinnut nalunaaruteqarluni taamatut ilisimatitsissuteqarpoq.
Tunngaviusumik ingerlatsinermi angusat allanngorpallaaratik 38 millioner koruuniupput, aningaasat nalingisa 3,1 millioner koruuninik iluarsineqarsimanerisa aamma 0,9 millioner koruuninik nalikilliisoqalaarsimanerata malitsigisaannik siornamut sanilliullugu angusaqarluartoqarsimavoq.
Taarsigassarsiaritinneqartut aatsaat taamak annertutigisut
Suliffeqarfiit inuinnaallu aningaaserivimmit taarsigassarserusussuseqarnerat aningaaserivimmi pisortap Martin Kviesgaardip nuannaarutigaa. Ukioq manna qaammatini siullerni pingasuni siorna piffissamut pineqartumut sanilliullugu Grønlandsbanken amerlanerusunik taarsigassarsisitsisimavoq. Taarsigassarsiaritinneqartut 3,905 milliarder koruuniusut aamma qularnaveeqqutigineqarsimasut 1,8 milliarder koruuniusut eqqarsaatigissagaanni aningaaseriviup oqaluttuarisaanerani aatsaat taamak annertugigipput, aningaaserivimmit nalunaarutigineqarpoq.
Taakku tunngavigalugit siorna 82,9 millioner koruuninik isertitaqarineqarsimasut ukioq manna qaammatini siullerni pingasuni 86,1 millioner koruuninut amerleriarsimapput.
- Takusinnaavarput suliffeqarfippassuit inuinnaallu aningaasaqarnerat aningaasaliissuteqartarnerallu suli ajunngitsumik ingerlasut. Tuniluuttoqarneranit nunarpassuit eqqugaanerlussimanerat eqqarsaatigissagaanni tamanna pitsaasuuvoq. Aamma unammillersinnaassuseqarluarnerput soorunami naammagisimaarparput.
Aningaaserivimmi pisortap oqaatigaa, inuiaqatigiinni pitsaasunik sinaakkusersuisoqarpat ineriartornissamut periarfissaqarluartoq.
- Soorunami kommunit Naalakkersuisunngortullu nutaat inuussutissarsiortunut pilerinartunik tutsuiginartunillu toqqammavissiinissaat aalajangiisuulluinnartussaavoq. Tuniluuttoqareerneratigut nukittuumik attanneqarsinnaasumillu inuussutissarsiornermik ineriartortitsinissamut maanna tunngavissiisoqartussaavoq, taanna oqarpoq.
Annikitsunik nalikilliliisoqarsimasoq
Covid-19 2020-p aallartinnerani nunarsuarmi tuniluummat aningaaserivimmit taarsigassarsiatinnneqarsimasut nalikillisinneqartarnerat sunnerneqarsimavoq. Tamtumunnga pissutaasut ilagisimavaat, takornariartitsinermik inuussutissarsiuteqartut, suliffeqarfiit akunnittarfiillu ingerlatsinerisa unitsikkallarneqarsimanerat.
- Pingaartumik suliffeqarfiit akunnittarfiillu takornarianik sullissisartut qaamasumik siunissaqarnissartik pisariaqartippaat. Neriuutigaara, assersuutigalugu takornariat coronamut akiuussutissalertissimanerminnut uppernarsaatillit eqqarsaatigalugit piviusorsiortumik periarfissarsiuunneqarnissaat eqqarsaatigineqassasoq. Takornariartitsisarneq suliffeqarfiutillillu angalasarnerat aallarteqqinneqarpata, aningaasaqarneq inissaqartitsinerlu qulakkiissagutsigit suliffeqarfinnit tamanna pisariaqartinneqarpoq, Martin Kviesgaard oqarpoq.
Nunarsuarmi tuniluuttoqarnerata qanoq ingerlasinnaanera suli nalorninartoqarnera pissutigalug. GrønlandsBankenip 2020-mi akileraarutit suli peernagit 130,9 millioner koruuninik angusaqarsimaneranut sanilliullugu, 2021-mi 115-135 millioner koruuninik angusaqarnissaminik naatsorsuuteqarnini suli attappaa.