Skip to main content

Grønlandsbanken nakkutilliisoqarfimmit pingasunik peqqussuteqarfigineqartoq

Aningaasarsiornermut nakkutilliisoqarfiup Finanstilsynip Grønlandsbankenimi aningaasanik pinerlunnikkut pissarsianik malunnarunnaarsaasoqartarneranik misissuineranit ukiut marlungajaat qaangiuttullu nassuiaammik pingasunik peqqussutitalimmik kiisami suliaqartoqarpoq

Grønlandsbankenip pisortaanut Martin Kviesgaardimut nassuiaat kingusiginartorujussuuvoq nassuiaatip imarisai aningaaserivimmit 2018-imili ilisimaneqalereersimammat taamaammallu Finanstilsynip piumasaqaataanik naammassinninniarneq ingerlaanneq aallartinneqarsimammat.

- Peqqussuteqarfigineqarneq tamatigut nuannerpallaartannngilaq, naak tigusimasavut pingasut paasiuminartuugaluartut, Martin Kviesgaard Sermitsiaq.AG-mut oqarpoq.

Imarisai ilisimaneqartut

- Imarisai 2018-imili ilisimalereersimavavut suleriaatsitsinninilu allannguinissat pisariaqartut suliaralugit ingerlaannaq aallartilluta, aningaaseriviup pisortaa oqarpoq, erseqqissaallunilu, peqqussutigineqartut Finanstilsynip pinerlunnikkut aningaasanik pissarsianik malunnaarunnaarsaasarnermut tunngasuni 2018-imi misissuereerluni aningaaserivinnut allanut peqqussutigisaasa assigigaat.

Finanstilsyni naliliivoq, ”aningaaseriviup Kunngeqarfimmi Danmarkimi aningaaserivinni agguaqatigiissitsinermut sanilliullugu pinerlunnik aningaasanik pissarsianik malunnarunnaasaasarnermut imaluunniit peqqarniisaarniartarnerup aningaasalersornissaanut atornerlunneqarnissamut aarlerinartorsiornera nalinginnaasumit qaffasissumut naliliiffigineqartoq”, nassuiaammi allassimasoqarpoq.

Peqqussutit pingasut

Peqqussutit pingasut imaapput:

  • Aningaaserivik peqqussuteqarfigineqassaaq  aarlerinartorsiornermik naliliisimanini nutarteqqullugu, taamaalilluni naliliinermi peqqarniisaarniarnermut  aningaasalersuinermut peqataatinneqarnissamut aningaaseriviup aarlerinartorsiornera  aamma isiginiarneqalersillugu.
  • Aningaaserivik tamatuma saniatigut  peqqussuteqarfigineqassaaq, sullitanut tunngasut  tamaasa siunertaannik annertussusaannillu paasissutissanik  naammattunik pissarsiniarnissap qulakkeerneqarnissaanik tamatumunngalu atatillugu sullitat pillugit paasissutissat nutarterneqarnissaannut piffissaliussamik suliarinninnissaanik.
  • Aningaaserivik taamatuttaaq peqqussuteqarfigineqassaaq, suliffeqarfinnut sullitanut tunngasut tamaasa eqqarsaatigalugit  suliffeqarfiit piginnittorpiaannik paasissutissanik  kinaassutsimillu uppernarsartaannik pissarsiniarnissap  qulakkeerneqarnissaanik tamatumunngalu atatillugu sullitat pillugit paasissutissat nutarterneqarnissaannut piffissaliussamik suliarinninnissaanik.

Ikiaarornartuerniarneq initusoq

Martin Kviesgaard paasissutisssiivoq, pingaartumik ikiaroornartuerniarnermut atatillugu pinerlunnikkut aningaasanik pissarsianik malunnarunnaasaasoqartarneranik pasitsaassisimaneq initusoq tamannalu pillugu aningaaserivik politiinik Akileraartarnermullu Aqutsisoqarfimmik oqaloqatiginnittoq.

- Kisianni ikiaroornartuerniarnerinnaanngitsoq aammali allat, pinerlunnikkut aningaasanik pissarsianik malunnarunnaarsaasarnerup aningaasallu nalunaarutiginngisamik pissarsiat tunuartinneqarsinnaaffiginngisaat, soorunami aamma isiginiarpavut, aningaaseriviup pisortaa paasissutissiivoq.

Taavami nunat tamalaat akornanni aningaasanik pinerlunnikkut pissarsianik malunnarunnaarsaasarneq, Danmarkimi aningaaserivinni angisuuni takuneqarsimasoq?

- Maani tamatuminnga pasitsaassaqarsimaanngilagut. Tamatuma saniatigut sullitat naalagaaffeqatigiinnerup avataaniittut arlaqanngitsut nalinginnaasumik tassaasarput siusinnerusukkut Kalaallit Nunaanni najugaqarsimasut, taamaattumik tassunga atatillugu naammattuugaqartanngilagut, Martin Kviesgaard oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER