GrønlandsBANKEN-ip taarsigassarsiarititai qaffariarujussuartut
Grønlandsbankenimit 2022-mi ukiup affaanut naatsorsuutit nuannaarutigineqarput – aamma aningaaseriviup obligationiutai ukiup qaammataani siullerni arfinilinni erniat qaffariarnerisa kingunerisaannik nalikillisimagaluartut.
Kalaallit Nunaanni aningaasaqarneq ingerlalluarpoq. Tamannalu Grønlandsbankenip 2022-p ukiuata affaani siullermi pitsaasumik ineriartorneranut sunniuteqarpoq, naak niuerfinni eqqissiviilliortoqarneranit sunnerneqarsimagaluarluni.
Grønlandsbankenimit tusagassiorfitsigut nalunaaruteqarnermi tamanna ilisimatitsissutigineqarpoq.
2022-mi ukiup affaani siullermi aningaaserivimmi suli akileraaruteqarnani inernerusut 45,8 millioner koruuniupput, taakku 2021-mi ukiup affaani siullermi 74,8 millioner koruuniusimasut. Nalimik nalimmassaanerit aamma nalikilliliinerit sioqqullugit inernerusut naammaginartumik kr. 73,1 millioner koruuniupput, ukiup siuliani 72,0 millioner koruuniusut.
- Tunngaviusumik ingerlatsineq iluarisimaarparput, ukiullu affaani siullermi negativiusumik nalimik nalimmassaanerit akueriinnartariaqarpagut, Grønlandsbankenimi pisortaq Martin Kviesgaard oqarpoq.
Taarsigassarsiaritinneqartartut qaffakkiartortut
2021-p naaneraniilli taarsigassarsisitsinerit 226 millioner koruuninik qaffariarput, ukiullu affaata siulliup naanerani 4.010 millioner koruuniullutik.
- 2022-p aallartilluarnera tunngavigalugu taarsigassarsiarititat iluarisimaarnartumik ineriartornissaat naatsorsuutigisimavarput, tamanna 2022-p sinneranut pitsaasumik ilimasulersitsivoq. Sullitat suli aningaasaliisarnerat uagullu ineriartornermut tapiissuteqarsinnaanerput takusinnaallugu pitsaasuuvoq, Martin Kviesgaard oqarpoq.
Qularnaveeqqutit 2021-p naaneranit 1.781 millioner koruuninit 190,9 millioner koruuninik amerleriarput, 2022-mi ukiup affaata siulliup naanerani 1.972 miollioner koruuninut.
Aningaaseriviup taarsigassarsiarititai qularnaveeqqusiinerilu taamaasillutik 417 millioner koruunit missaannik qaffariarput, maannamullu aatsaat taama qaffasitsigigallarlutik.
Ingerlatsinermi isertitat aalaakkaasut
2022-mi ukiup affaani siullermi ernianit, akiliutinit allanillu ingerlatsinermi ilanngaateqareerluni isertitat kr. 170,9 mio.-iupput. Tamanna 2021-mi piffissamut tassunga assersuutissagaanni allanngunngingajappoq.
Aningaasartuutit ataatsimut nalikilliliinerit ilanngullugit 2022-mi kvartalip siulliup naanerani 97,8 millioner koruuniupput, piffissami tassani 2021-mi 98,3 millioner koruuniusut, taamaasillunilu aningaaseriviup taarsigassarsiarititaani inernerusoq nalimik nalimmassaanerit aamma nalikilliliinerit sioqqullugit 73,1 millioner koruuninut qaffariarput.
Niuerfimmi eqqissiviilliorneq nalini annaasaqarnermik kinguneqartoq
Erniat qaffannerisa kiisalu nalinginnaasumik niuerfimmi eqqissiviilliornerup kingunerannik – Grønlandsbanken naapertorlugu - nalinik nalimmassaanerit juni 2022-p naanerani 25,2 millioner koruuninik nalini annaasaqartoqarpoq, piffissami tassani 2021-mi nalini 5,1 millioner koruuninik iluanaaruteqartoqartoq.
Aningaaseriviup obligationiutai ukiumi qaammatini siullerni arfinilinni erniat qaffariarnerisa kingunerisaanik nalini annaasaqaataapput.
- Isigalugu nuannerpallaanngilaq, kisiannili erniat qaffariarujussuarnerat eqqarsaatigalugu nalini annaasaqarneq ersarippoq. 1 milliardit sinnerlugit obligationinik tigummisaqaraanni tamakku ilaapput, Martin Kviesgaard oqarpoq.
Grønlandsbankenip ukiup affaani angusaqarlunermigut ajunngitsumik ingerlanini ingerlatiinnarpaa, tassa aningaaseriviup 2021-mi akileraarutit suli peernagit 158,9 millioner koruuninik angusaqarluarsimanini nangillugu angusaqarluarami.