Grønlænderstivimiit grønlændervendingimut

Oqaatsit nutaarluinnaat Den Danske Ordbogimi ilanngunneqarput

Oqaaseq flyfrisk (timmisartukkut tikerlaaq, aaqq.) qallunaat kalaallillu oqaasiini ilisimaneqarluareerpoq, pisiniarfinnilu nioqqutit tikerlaat pillugit Kalaallit Nunaannilu sulisut nutaat pillugit atorneqareersuulluni. Oqaaserlu taanna, oqaatsit allat 780 nutarsarneqartut ilanngunneqarneranni, Den Danske Ordbogimi maanna ilanngunneqarpoq.

- Oqaaseq taanna kalaallinit ukiuni arlalinni kingullerni atorneqartareersoq ilisimavarput, oqaaserli Danmarkimi aamma atorneqaleriartorpoq, soorlu mozzarellat timmisartukkut tikerlaat neqeroorutigineqarneranni, Lars Trap-Jensen Det Danske Sprog- og Litteraturselskabimeersoq, Den Danske Ordbogimillu suliaqartuusoq oqaluttuarpoq.

Grønlænderstiv oqallitsitsingaatsiartoq

Trap-Jensen oqaluttuarpoq, qaannamik sangoriaaseq ”grønlændervending” oqaatsini nutaani ilaasoq, kalaalliniillu isumassarsiaalluni.

- “Grønlænderstiv”-ip siorna ordboginut ilanngunneqarneratulli oqallitsitsitigissagunanngilaq, Lars Trap-Jensen. Oqaaseq taanna siorna ordbogimut ilanngunneqarmat taanna nassuiaavoq Den Danske Ordbog oqaatsinik atorneqartunik ilanngussuisarluni oqaatsilli isumaannik nalilersuissanatik.

- Den Danske Ordbogip grønlænderstiv nassuiaaserpaa pissutigalugu oqaaseq ulluinnarni atorneqartarmat. Soorunami oqaaseq “nikassaarpaluppoq immikkoortitsisuullunilu” kisianni oqaatsit allarpassuit aamma taamaapput. Qallunaat isumaliutigiliinnagaannit oqaatsit allat imaapput: pølsetysker, frøæder (narasitortartoq, franskit pillugit, aaqq.), spaghetti (italiamiu), fjeldabe (norgemiu). Oqariartaaseq pavetut aalakoortoq aamma pigaarput.

Oqaatsimik nassiussigit

Den Danske Ordbog atuisunit siunnersuutigineqartunik suliaqartarpoq. Oqaatsinik nutaanik ilanngussinermi oqaatsit 170-it atuisunit siunnersuutigineqarput, soorlu oqaatsit dialogkaffe, hjemmeblind aamma nationalskjald. Aaqqissuisoqarfik oqaatsinik siunnersuutinik nutaanik pissarsigaangami oqaatsit allattorsimaffiannut ingerlaannaq ikkunneqarneq ajorput, aaqqissuisulli suliassaattut immikkut inissinneqarallartarlutik. Oqaaseq atorneqarluartarpat oqaatsit allattorsimaffiannut ilanngunneqarnissaa ilimagineqarluarsinnaavoq.

Lars Trap-Jensenip Kalaallit Nunaanni innuttaasut tamaasa kaammattorpai oqaatsinik siunnersuuteqaqqullugit. Ugguuna siunnersuuteqartoqarsinnaavoq.

Powered by Labrador CMS