Assammik arsarluni GM
Grønlandsbankip Norsaq HC-mik sponsoritut isumaqatigiissunni nangippaa
Klubbi Aasianneersoq Norsaq HC, siorna nunatsinni pissartanngorniunnermi tupaallatsitsilluni finalimut annguttoq, ukioq manna aningaaserivimmit aningaasanik tapiiffigineqaqqippoq
Inersimasut assammik arsarluni nunatsinni pissartanngorniunnerat apriilip 23-anni aallartissaaq. Pissartanngorniunnerit Ilulissani ingerlanneqassapput, tassanilu angutit holdit arfineq-marluk arnanilu holdit arfinillit peqataassapput.
Sponsori taanna
Aasianni klubbi Norsaq HC, siorna nunatsinni pissartanngorniunnermi tupaallatsitsilluni finalimut annguttoq, ukioq manna Grønlandsbankimit aningaasatigut tapiiffigineqaqqippoq, aningaaserivik taamatut paasissutissiivoq.
Aningaaseriviup Aasianni immikkoortoqarfiata pisortaa Niels-Anthon Petersen pissangalluni malinnaavoq.
Angusaq imaannaanngitsoq
– Assammik arsarneq maani Aasianni meeqqanit inersimasunillu ingerlalluarneqalersimavoq, Norsaq HC-lu siorna nunatsinni pissartanngorniunnermi finalimut annguppoq. Angusaq imaannaanngitsoq tusaamaneqalersitsisoq suli sakkortunerusumik sungiusarnissamut piumassuseqalersitsivoq. Tamanna Grønlandsbankip tapersersorpaa, Niels-Anthon Petersen aningaaseriviup nittartagaanut oqaluttuarpq.
Pissartanngorniunnerni illoqarfiit makku peqataatitaqassapput: Paamiut, Nuuk, Maniitsoq, Sisimiut, Ilulissat Aasiallu.
Finalit apriilip 28-anni ingerlanneqassapput.