Greenpeace: Mærsk mianersuaalliorpoq

Issittumi misileraalluni qillerinermi Namminersorlutik Oqartussat isumannaatrsuunermut piumasaqaataat Mærskip unioqqutinniarpai.
Taamatut tallimanngormat allappoq MetroExpress, misileraallunilu qillerinerit sioqqullugit namminersorlutik oqartussat isumannaatsuunermut piumasaqaataasa malikkumaneqannginnerannik nalunaarut isornartorsiorneqarpoq.
– Mærskip siunnersuutaa ersarissumik Kalaallit Nunaannik tatisiniarneruvoq sumiiffimmilu misileraalluni qillerinerup taama ulorianartigisumi isumannaatsuunermut malittarisassat ersarissumik sakkukilliniarneqarmata paasisinnaanngilluinnarpara taamaasiornermut qunusoqanngimmat, Geus-imi pisortap tullia soraarneq Kai Sørensen oqarpoq.
Taanna Greenpeacemi qallunaat issittumi suliniutaannut pisortamit Niels Fuglsangimit taperserneqarpoq.
– Isornarluinnarpoq Kalaallit Nunaanni uuliamik qilleriniarnerminut atatillugu Mærskip isumannaatsuuneq immeraassutiginiarmagu. Taama avannarpasitsigisumi qillerinerit ulorianartoqareeqaat, taamaattumillu Mærsk isumannaallisaanermi siuttuusariaqaraluarpoq sakkukillisaaniarani, Niels Fuglsang oqarpoq.
Taanna isumaqarpoq ukiut pingasut matuma siornatigut mexicop kangerliumarngani uuliamik ajunaarnersuaq Mærskip ilinniarfigisimasariaqaraluaraa.
– Mærskilli immikkut isertitaqarsinnaanissaq isumannaatsuunermit pingaartinnerusimagunarpaa. Tamanna akisussaassuseqanngitsuliorneruvoq. Kalaallit Nunaata sineriaata avataani uuliamik ajutoorneq tamaani avatangiisinut kalaallinullu inuiaqatigiinnut siumut isigineqarsinnaanngitsumik kinguneqassaaq. Uulia puttaat akornannut pissappat qallorniarnissaanut teknologi-mik peqanngilagut. Mærsk eqqarsaqqittariaqaraluarpoq isumannaatsuunermi malittarisassat sakkukillineqarnissaanik piumasaqannginnermini.
Aamma atuaruk: Mærskip isumannaatsuunikkut Kalaallit Nunaat tativaa
Isumannaatsuunissamut qillerivinnik marlunnik peqarnissamik Namminersorlutik Oqartussat piumasaqaataat pisariaqarluinnarpoq, Niels Fuglsang oqarpoq, innersuussutigalugulu tamanna USA-mi Canadamilu aalajangersimasumik malittarisassaasoq:
– Uuliamik aniasoqalissagaluarpat qillerivillu qilleriffiusoq ikuallalissagaluarpat pisariaqarluinnarpoq qillerivimmik allamik peqarnissaq, uulia aniasoq sukkanerpaamik unitsikkumallugu. Mærskip avatangiisinik suusupaginninniarnera Kalaallit Nunaanni Danmarkimilu politikerit ersarissumik itigartittariaqarpaat. Nunarsuarmi avatangiisit sunnertianersaanni, Issittumi, isumannaatsuuneq pingaarnersaatinneqartariaqarpoq. Ataatsimut avatangiisivut Mærskip amerlanerusunik iluanaarniarluni immeraassutigissanngilai, NIels Fuglsang oqarpoq.