Greenlandic Greenhouse avatangiisit pillugit nersornaaserneqarnissamut innersuunneqarsimasoq
Nuummi suliffeqarfik inuussutissanik imminnut attanneqarsinnaasunik pesticiditaqanngitsunillu naatitsisartoq Nunani Avannarlerni Siunnersuisoqatigiit avatangiisit pillugit Nersornaasiuttagaanik nersornaaserneqarnissamut innersuunneqarsimavoq.
Greenlandic Greenhouse, Nuummi naatitanik naatitseriarluni najukkami pisiniarfinnut nerinairtarfinnullu tunisaqartartoq Nunani Avannarlerni Siunnersuisoqatigiit 2021-mi Avatangiisit pillugu Nersornaatissaanik nersornaaserneqarnissamut innersuunneqarsimavoq.
Nunani Avannarlerni Siunnersuisoqatigiit nittartakkatigut ilisimatitsipput.
- Greenlandic Greenhouse inuussutissanik imminnut attanneqarsinnaasunik pesticiditaqanngitsunillu naatitsisarpoq, taakku umiarsuarmik timmisartumillu assartorneqartartunit akikinnerupput. Suliffeqarfik suliffeqarfinnut inuinnarnullu tunisaqartarpoq, innersuussinermut tunngavilersuutigineqartut ilaat taamatut nipeqarpoq.
Greenlandic Greenhouse 2018-imi Nuummi ammarneqartoq innaallagissamik nukimmit ataavartumeersumit pilersorneqarpoq, tassa kissarneq sinneruttoq tunisassiorfiup kiassarneqarneranut atorneqartartpoq. Imiullu tunisassiornermi atorneqartartup 90 procentia atoqqinneqartartoq ilisimatitsissutigineqarpoq.
Aallarnisaasimasoq tulluussimaartoq
Greenlandic Greenhousemik aallarnisaasimasup Nicklas Birkelyp innersuunneqarsimanertik nuannaarutigaa:
- Taamatut kusanartigisumik nersornaaserneqarnissamut innersuunneqarsimanerput tulluussimaarutigilluinnarparput. Nersornaaserneqassagaluarutta alliliinissamik pilersaaruterput piaarnerusumik isumagisinnaanngussagaluarparput, taamalu nunamut tikisitsisarnerup atorunnaarsinneqarnissaanik suliffissanillu amerlanerusunik pilersinitsinissamik anguniagaqarnerput ingerlateqqissinnaassalutigit. Soqutiginartunik arlalinnik pilersaaruteqarpugut taakkunanngalu avitseqateqarnissarput qilanaaralugu, Nicklas Birkely Sermitsiaq.AG-mut oqarpoq.
Nersornaaserneqartoq Nunani Avannarlerni Siunnersuisoqatigiit 2021-mi novembarip aappaani Københavnimi nersornaasiippata tamanut saqqummiunneqassaaq. Nunani Avannarlerni Siunnersuisoqatigiit nersornaasigassatut innersuussaat arfineq-pingasut siunnersuisoqatigiit nittartagaatigut kikkuunersut takusinnaavatit.