Greenland Water Bank: Naalakkersuisut eqqarsarluaqqissaartariaqarput

Greenland Water Bank, imermik puilasumeersumik Imivimmik Qeqertarsuup eqqaani Uunartuarsummiit tunisassiortoq, ukiullu pingasut tamaviaareerluni avammut nioqqutissiornissaminut akuersissummik pissarsisimasoq aarlerivoq Naalakkersuisut imeq pillugu periusissiaat nutaaq suliffeqarfinnut nunatsinneersunut iluaqutissanut sanilliullugu akimmiffissanik amerlanerusunik pilersitsinermik kinguneqarsinnaasoq.

Greenland Water Bankimik, imermik Qeqertarsuup eqqaani Uunartuarsummeersumik tunisassiortumik piginnittut Jørgen Wæver Johansen aamma Svend Hardenberg imeq pillugu periusissiaq nutaaq pillugu ernumassuteqarput.

Kalaallit Nunatsinnit sermimik imermillu avammut tunisassiorsinnaaneq siuarsaaviginiarlugu suliniutit tamaviaarutigineqaleruttorput, siorna akuersissutit 16-it tunniunneqarput, ukiorlu manna sumiiffiit imermik tunisassiornermut aallaviusinnaasut tallimat neqeroortitsissutigineqassapput.

Aviisi Sermitsiaq taama allappoq.

Neqeroortitsinissanut nutaanut, marlunngormat ammaanneqartunut tunngatillugu Inuussutissarsiornermut, Nukissiuuteqarnermut Sulisoqarnermullu naalakkersuisoqarfimmit sumiiffiit tallimat taakku sumiippiarnersut saqqummiunneqarput, taakkulu 1. septemberip tungaanut neqeroorutigineqarsinnaalerput. Matumani pineqarpoq imeq sermip aanneranit kuukkoortut Qaqortup, Qeqertarsuatsiaat aammalu Maniitsup eqqaaneersuupput.

Tamatumali saniatigut aamma naalakkersuisoqarfimmit ilisimatitsissutigineqarpoq Qaqortumi, Paamiuni, Sisimiuni, Sarfannguani aammalu Qeqertarsuarmi Nukissiorfiit imermik pilersuinermini sinneqartoorutai tunisassiornissaq siunertaralugu pisiarineqarsinnaasut.

Tusaannarlugu isumassarsiatsialaarpasittutut nipeqaraluarpoq, tassami piumasaqaatinut ilaagami ingerlatseqatigiiffiit imermik avammut nioqqutissiorumasut pinngitsooratik nunatsinni angerlarsimaffeqassasut.

Taamaattorli aamma eqqumaffigisassaavoq ingerlatseqatigiiffik nunatsinni angerlarsimaffilik pisariitsuaqqamik koruunimik ataatsimik akiliinikkut nunani allamiut aamma nunatsinni pilersitsisinnaammata – tassa aallarnisaasutut ingerlatseqatigiiffittut ilusilerlugu (IVS) pilersitsisoqarsinnaagami, taamaattunillu ingerlatseqatigiiffinnik pilersitsisut Namminersorlutik Oqartussaniit nunaqavissutut akuerineqartarput, taakkulu nunaqavivissut assigalugit periarfissaqartinneqartarput nunatsinni suliniutinut nunaqavissutulli neqerooruteqassallutik ingerlatseqatigiiffittullu nunaqavissutut nalinginnaasutut nammineq aningaasaateqartutut ingerlatseqatigiiffinnik pilersitsissallutik. Siorna sermimik imermillu neqeroortitsinermi ingerlatseqatigiiffinnit neqeroortunit arfineq marluusunit tallimat aallarnisaasutut ingerlatseqatigiiffiupput (IVS), taakkunanngalu arlallit koruuni ataatsimik aningaasaateqarnerarlutik nalunaarsimapput. Pissutsillu taamaannerat ingerlatseqatigiiffimmut pioreersumut Greenland Water Bank-imut, Imivimmik tunisassiortumut aammalu nunatsinni ingerlallualaalivereersumut, allaallu nunatsinni imermik puiaasamut literip affaanik nioqquteqarnermi 50-55 procentimik annertussusilimmik nioqquteqartumut aarlerinissamut pissutissaqalersitsisimavoq:

– Ukiut pingasut ingerlanerini akuersissummik aammalu avammut nioqqutissiornissamut atuisinnaanermik pilersaarutitta ingerlassinnaanissaa siunertaralugu tamaviaarnikuuvugut, tassa inissitassat inissinneqarniarnerini Imiviup avammut nioqqutigisinnaalernissaanut pilersaarutivut ukiunik pingasunik kinguaattooqqapput. Periarfissat ukiut pingasut matuma siorna pigisimasagut ullumikkut periarfissariunnaareerpavut, taamaattorli aamma qujanartumik periarfissat nutaat aamma takkunnikuupput ukiut pingasut matuma siorna periarfissaasimanngitsut, tamatumalu malitsigisaanik niuernikkut anguniakkagut pilersaarutigullu allanngortiterpagut pissutsinut nutaanut naleqqussarlugit. Taamaattoq maanna aamma nalorninermik pilersitsisoqarpoq, niuernikkut pilersaarutigut ilumut attanneqarsinnaanersut apeqqusernarsilluni, tassunga pissutaavoq ilaatigut pisortat tungaannit kissaatigineqarsimammat ingerlatseqatigiiffipput nunatsinnit aallaavilik pissutsinut nutaanut naleqqussaleruttortoq unammillernerneqassasoq, Greenland Water Bankimik piginneqataasoq Jørgen Wæver Johansen aviisimut Sermitsiamut oqarpoq.

Aviisimi Sermitsiami atuarnerusinnaavutit. Aviisi uani pissarsiarisinnaavat:

Powered by Labrador CMS