Namminersorlutik Oqartussat aningaasaliisarnermut inuussutissarsiutinillu siuarsaanermut ingerlatseqatigiiffiat Nalik Ventures 2022-mi angusaqarnerluppoq, maannalu aningaasaqarnerup iluarsiniarneqarnissaanik ukkataqarniarpoq.

Ingerlatseqatigiiffiup pingasunngornermi ataatsimeersuarnerani tamanna saqqummiunneqarpoq. Greenland Holding 2022-mi Nalik Venturesimik taaguuteqalerpoq. Ingerlatseqatigiiffiit taassuma ingerlatai Greenland Venture aamma Innovation Greenland peqatigisaanik Nalik Capitalimik aamma Nalik Startupimik taaguuteqalerput.

Ingerlatseqatigiiffik pingaarneq 2022-mi 82 mio. kr.-nik amigartooruteqarpoq, tamannalu pingaartumik katillugit 33 mio. kr.-nik Greenland Ruby A/S-imi nalikilliliinernik pissuteqarpoq.

Pissarsiassaqarpasinngitsoq

Nalik Venturesip ingerlatseqatigiiffiutini Nalik Capital aqqutigalugu Greenland Rubymi 10 aamma 15 procentit akornanni piginneqataavoq, taanna Aappaluttumi rubininik piiaavoq. Siunissami qaninnermi aningaasaliinermut pissarsisoqarnissaa akiliisoqarnissaalu naatsorsuutigineqanngitsoq, Nalik Ventures allappoq.

Rubinisiorfimmi sulineq ukioq manna unitsikkallarneqarpoq. Greenland Rubyp sulisut 30-t decembarimi soraarsippai, piiaanerup nangeqqinneqannginneranilu sumiiffimmi rubineqassusaanik misissueqqinnissamut pisariaqartitsisoqartoq nalunaarutigalugu.

Nalik Venture tamatuma saniatigut aamma akileraarutitigut 26 mio. kr.-nik nalikilliliivoq. Pappiaqqanilu nalilinni 9,1 mio. kr.-nik annaasaqarneq ukioq manna angusat appartinneqarput.

Angusaq naammaginanngitsutut nalilerneqarpoq

Siulersuisut angusaq naammaginartinngilluinnaraat, naatsorsuutini allaqqavoq, ingerlatseqatigiiffiullu aningaasaqarnerup maanna iluarsinissaa ukkataraa:

- Siulersuisut akiligassarsinermut politikkimik nutaamik aamma periusissamik suliamik annertuumik Nalik Venturesip Kalaallit Nunaanni siunissami inissisimanissaa ukkatarineqarpoq aamma ingerlatseqatigiiffimmi patajaannerusumik peqqinnartumillu aningaasaqarnissaq pillugu, siulersuisuni siulittaasoq, Miki Lynge oqarpoq.

Pisortaq Karsten Høyip ukiuni 15-ini pisortaareerluni atorfimminit tunuarnera marsimi saqqummiunneqarpoq. Aningaasaqarnermut pisortaq Peter Christiansen pisortaagallarpoq.

Siulersuisuni ilaasortat marluk nutaat

Ataatsimeersuarnermut atatillugu Hanne Kristiansen siulersuisunit tunuarpoq, taarsiullugu Lykke Geisler Yakaboylu aamma Anders Stenbakken ilaasortanngorput.

Anders Stenbakken KNI-mi attaveqaqatigiinnermut nittarsaassinermullu pisortaavoq, siornatigullu ukiuni arfineq-marlunni Visit Greenlandimi pisortaanerunikuuvoq aamma Destination East Greenlandimi pisortaanikuulluni. Lykke Geisler Yakaboylu ukiuni 20-ni Visit Greenlandimi sulivoq, 2018-miilli takornariartitsinerup iluani namminersortutut sulivoq.