Greenland Minerals: Thorium Tasermut iliorarneqartassaaq
GM-ip pisortaata Australiamiup Thoriumip uninngasuutigineqarnissaa ulorianartussaqartinngilaa, piiaaffillu ammasoq, Narsamit 8 kilometerit inorlugit ungasissusilimmiittoq uranimik aatsitassanillu qaqutigoortunik piiaaffiusussaq, Kinamiunit tiguneqarnavianngitsoq oqarluni.
Greenland Mineralsip pisortaa John Mair neriorsuivoq thorium radioaktiviusoq Kuannersuarni piiaaffimmi ajornartorsiutaanavianngitsoq.
– Thorium Narsap eqqaani qaqqat sananeqaataasa ilagaat. Qaarsup piiakkap ilaannamininngua atortassavarput. 96-97 procentiata missaaniittoq tatsimi Tasermi tailinginut inissiisarfinnut marlunnut inissinneqartassaaq. Piiakkat inissitavut annikitsuinnarmik thoriumeqartassapput – avatangiisini pinngortitamiittumit annertuneruallaanngitsumik. Taamaattumik thorium ajornartorsiutaanavianngilaq, aatsitassarsiorfiup pisortaa isumaqarpoq.
GM-ip aatsitassat qaqutigoortut saniatigut urani piiaaffimmit piiarneqartoq tuniniartassavaa. Thoriumili radioaktiviusoq ullumikkut aningaasarsiutaasinnaanngilaq atorneqarsinnaannginnami.
Ernumassutaasut paasisinnaavai
– Thorium immaqa kingusinnerusukkut aningaasarsiutaalersinnaavoq. Taava Kalaallit Nunaat pisuunngussaaq, Mair oqarpoq.
Kemiskimik akuiaaviup qularnartoqartinneqaleraluttuinnarnera pillugu John Mair oqarpoq akuiaanermi syre liiterit tusintilippassuarnik annertutigisoq ”suujunnaarsinneqartassasoq”, kingornalu Tasermut inissinneqartassalluni.
Isorinnittut ersissutigaat piiaaffimmit eqqakkanit Tasermut inissinneqartunit piffissap ingerlanerani stoffinik ulorianartunik aniasoqalissasoq, imermik pinngortitamillu mingutsitsisunik.
– Inuit ernumanartoqartitsinerat paasisinnaavara. Akuiaavippulli nutaaliarujussuussaaq. Tunisassiorneq tamarmi taamaassaaq. Taseq kusugaasanik nateqarpoq, taamaattumik stoffinik ulorianartunik aniasoqarnavianngilaq. Ingerlatseriaasissat avatangiisillu immikkut ilisimasalinnit attuumassuteqanngitsunit misissorneqarsimapput, ilaatigut Danmarkimi DCE-mit, John Mair oqarpoq.
Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq: