Greenland Minerals: Piiaanissamut akuersissummik pisinnaatitaaffeqarpugut

Greenland Mineralsip isumaqatigiissitsiniartarfimmi naammagittaalliutaa maanna pisortatigoortumik ingerlanneqalerpoq, tassanilu takuneqarsinnaavoq, Greenland Mineralsip Kuannersuarni suliniutimik uranimut inatsimmit, suliniut unitsinniarlugu akuersissutigineqarsimasumit, pineqannginnerata isumaqatigiissitsiniartarfimmit ilalerneqarnissaa anguniaraa.

Australiamiut ingerlatseqatigiiffiat Namminersorlutik Oqartussanut Danmarkillu naalagaaffianut isumaqatigiissitsiniartoqarnissaanik qinnuteqaamminik marsip

22-ani nassiussivoq.

Aviisi Sermitsiaq allappoq.

Aatsaat maanna naammagittaalliuummik suliassanngortitsinerat pisortatiguulerpoq, tassanilu takuneqarsinnaavoq, ingerlatseqatigiiffik isumaqartoq, piiaanissamut akuersissummik pisinnaatitaaffeqarluni. Piiaanissamut akuersissummik tunineqanngikkunik piginnittuuunnaarsitaanermut taarsiissuteqarfigineqarnissamik piumasaqaateqarlutik suliamik ingerlatitseqqinniarput.

Tamatuma akerlianik Namminersorlutik Oqartussat isumaqarput, ingerlatseqatigiiffik piiaanissamut akuersissummik imaluunniit taarsiivigineqarnissamik piumasaqaateqarsinnaanngitsoq.

Akerleriissutigineqartoq tassaavoq, uranimik piiaanissamut inerteqqut, Inatsisartunit

decembarimi 2021-mi akuersissutigineqartoq, piiaanissamut akuersissummut atuuttussaanersoq. Ingerlatseqatigiiffik misissuinissamut akuersissutaateqaruni piumasaqaatinillu aalajangersimasunik naammassinnissimaguni piiaanissamut akuersissummik piumasaqarsinnaatitaavoq.

Inerteqquteqalernissap akuersissutigineqannginnerani misissuinissamut akuersissummik tunniussisoqarsimammat Greenland Minerals isumaqarpoq akuersissutaatertik aatsitassanut inatsimmit pineqanngitsoq, akerlianilli Namminersorlutik Oqartussat isumaqarlutik, isumaqatigiissutit marluk pineqartut: Misissuinissamut akuersissut aamma piiaanissamut akuersissut.

Kingullertullu taaneqartoq Greenland Mineralsip suli pissarsiarisimanngilaa.

Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq:

Powered by Labrador CMS