KL

DK

Greenland Mineralsimut Kuannersuarni siunissaq ajornakusoortoq

Greenland Mineralsip ullumikkut aaqqissuussisimanera tunngavigalugu suliniut piiaanissamut akuersissummik pissarsisinnaanavianngitsoq, aatsitassanut naalakkersuisoq, Naaja Nathanielsen, oqarpoq, aatsitassarsioqatigiiffiullu Naalakkersuisunik ataatsimeeqateqarsimanerarnera eqqumiigalugu. Ataatsimeeqatigisimanngilavut, oqarpoq.

– Greenland Minerals piiaanngilluinnarnissamik inatsit atuutilerpat piiaanissamut akuersissummik pissarsisinnaanavianngilaq, misissueqqissaarinissamullu akuersissutaatimik sivitsorneqarnerani Naalakkersuisut misissueqqissaarinissamut akuersissuteqarnertik piiaanngilluinnarnissamullu inatsisip, taamanikkussamut atuutilersussap, akornanni naapertuussutsimik pilersitsissapput, Aatsitassanut Naalakkersuisoq, Naaja Nathanielsen (IA) oqarpoq.
Redaktionen

Innuttaasunik ataatsimiititsinernut kingullernut atatillugu oqaatigivat, Greenland Mineralsimik suliaq suli ukiup ataatsip missaani ingerlaqqissinnaasoq. Tamanna itisilersinnaaviuk? Greenland Mineralsimik suliap ingerlanissaa qanoq takorloorpiuk?

Aviisi Sermitsiaq Aatsitassanut Naalakkersuisumut, Naaja Nathanielsenimut aperivoq.

– Suliami inatsisit malinneqarput. Ullumikkut (ataasinngornermi septembarip 13-iani, aaqq.) tamanut ammasumik tusarniaaneq naammassivarput, tamatumalu kingorna akissutit allattorsimaffiannik suliaqartoqassaaq. Akissutit allattorsimaffiat tunngavigalugu VSB aamma VVM nutarterneqarsinnaassapput. Suliami nalinginnaasumi tamanna IBA-mik isumaqatigiissutit pillugit isumaqatigiinniarnernik aamma piiaanissamut akuersissummi piumasaqaatit, piaanissamut matusinissamullu pilersaarut kiisalu ingerlatsinermi akuersissutit assigiinngitsut pillugit aallarniutaasunik suliaqarnernik malitseqartussaavoq, Naaja Nathanielsen Sermitsiamut nassuiaavoq.

- Kisianni tamanit ilisimaneqartutut naalakkersuisoqatigiit ukiakkut ataatsimiinnermi uranimik piiaanerup akuersaanngilluinnarnissaanik siunnersuummik saqqummiussaqassapput. Killiliussassatut siunnersuutigineqartoq 100 ppm (parts pr. million) Greenland Mineralsip suliniutaanut sunniuteqassaaq, suliniutaanni tunuliaqutaasumik qinngualanerit killiliussamit tassannga qaffasinnerummata. Greenland Minerals suli attaveqarfigisimanngilara, taamaattumik suliniutip siunissaa pillugu isumaliutaannik ilisimasaqanngilanga. Ullumikkut aaqqissuussisimanerat eqqarsaatigissagaanni suliniutaat piiaanissamut akuersissummik pissarsisinnaanavianngilaq.

Allaaserisaq tamaat uani Sermitsiami pisiarisinnaasanni atuaruk:

nunatsinnit inuussutissarsiutit
Powered by Labrador CMS