Greenland Mineralsimut itigartitsissut piareertoq
Naalakkersuisut Kuannersuarni piiaanisssamut Greenland Mineralsimut itigartitsissummut missingiummik tusarniaassummik nassiussipput. Ingerlatseqatigiiffiup suliap ingerlanneqarnera naammaginngilaat, saniatigullu naalagaaffimmut Namminersorlutillu Oqartussanut isumaqatigiissitsiniarnissamut suliamik aallartitsiniarsaripput,
Kuannersuit pillugit oqaluttuaq imaluunniit sorsunneq ingerlavoq, ingerlatseqatigiiffiup saniatigut Namminersorlutik Oqartussanut isumaqatigiissitsiniarnermik suliamik aallartitsiniarsarivoq.
Greenland Mineralsip Kuannersuarni piiaanissamut qinnuteqaatiminut aalajangiinermik suliap unitsinniarsaraa, tassani pingaarnertut aatsitassanik qaqutigoortunik saniatigut urani tunisassiaralugu piiaanissamik kissaateqarput.
Naalakkersuisut illuani suliaq unitsinniarsaraat. Uani sapaatip-akunnerani Aatsitassanut Inatsisinillu Atuutsitsinermut Naalakkersuisoqarfik Greenland Mineralsimut piiaanissamik akuersissummut itigartitsissummut missingiummik nassiussaqarput, ingerlatseqatigiiffiup tunngaviusumik sapaatip-akunnerini sisamani oqaaseqaateqarfiginissaanut periarfissaqarfigaa.
Itigartitsissut siulleq tunniunneqartoq
Greenland Minerals 21. juli Isumaqatigiissitsiniartarnermut eqqartuussivimmi Kuannersuarni misissuinermut akuersissummut qinnuteqaatip aalajangiiffiginiarneqarnerata unitsinnissaanik kissaateqarnermini itigartinneqarpoq, tamatumalu Naalakkersuisut itigartitsilluni aalajangiinermut missingiutip ingerlatseqatigiiffimmut tusarniaassutigalugu nassiunnissaanut periarfissippai.
Piiaanissamut akuersissummik qinnuteqaatip itigartitsissutigineqarsinnaanersoq Greenland Minerals nittartakkamini allappoq, malmimi 100 ppm-imik annertunerusumik uranitaqartumik piiaanissamik imaqaqqaartariaqarnera pissutigalugu.
Aatsitassani Inatsisinillu Atuutsitsinermut Naalakkersuisoqarfimmi pisortap, Jørgen Hammeken Holmip taamatut oqariartuuteqarneq, Sermitsiaq.AG-mut ilumoornerarpaa.
Naalakkersuisoqarfik isumalluarpoq
Naalakkersuisut aalajangiinermut missingiummut tunngatillugu iliuusaat ingerlatseqatigiiffiup pakatsissutigalugittaaq allappoq, uranimut inatsisip nutaap atorneqarnera isumaqatigiissitsiniarnermik suliami apeqqutit ilagimmassuk.
- Tamatuma saniatigut piiaanissamut akuersissuteqarnissamut piumaqaatit ilaat ilaanngikkaluartut, naalakkersuisut aalajangiipput, suleqatigiinnissamut isumaqatigiissummut tusarniaanermit nalunaarusiat naammassineqarnissaat amigaataapput.
Aallaqqaammut isumaqatigiissitsiniarnissamik suliap itigartitsissutigivinneqarnissaa misilinniarlugu, Aatsitassanut Naalakkersuisoqarfik Sermitsiaq.AG-mut ilisimatitsivoq. Iluatsinngippat Greenland Mineralsip suliap ingerlaneranut aamma piiaanissamut itigartitsinermut aalajangiinermut missingiummut maalaarutaannut tunngavilersuinermik aallartitsisariaqassapput.
- Itigartitsissutigineqarnissaa qularinngilarput, kisianni soorunami inissereerneqartussaanngilaq, Jørgen Hammeken Holm oqarpoq.
