- Greenland Mineralsip Kuannersuarni aatsitassat qaqutigoortut pillugit suliniut 2007-imi pilersikkamiulli naalakkersuisut assigiinngitsut atuussimapput.

- Naalakkersuisut nutaat atuutsinneqaleriarpata suleqatiginissaat suliffeqarfimmit qilanaaraarput, ingerlatseqatigiiffik nalunaaruteqarluni allappoq.

Aktiat nalingi apparujussuarsimasut

Atsitassarsiorfiutileqatigiiffiup aktiaataasa nalingi pingasunngormat qinersisoqarmalli 40 procentinik nalikillisimapput, ataatsimulli isigalugit 2021-p ingerlanerani katillugit 60 procentinik nalikillisimallutik.

Aatsitassarsiorniarneq unitsinneqavissinnaavoq, qinersinermi ajugaasut - Inuit Ataqatigiit (IA) - uranimik piiaasoqarniarnera pissutigalugu sulinummut akerliummata.

Greenland Mineralsip nalunaarummini aningaasaliisartuminut aamma maluginiaqquaa -

IA-p qinersisoqareersoq isummani allanngortinnagu uteqqissimagaa

Aatsitassat qaqutigoortut siullertut elektronikkimi atorneqartartut suliniummi siunertarineqarput. uran, zink flouritsilu saniatigut qaqinneqartarput.

Greenland Minerals naapertorlugu saniatigut qaqinneqartussat suliniutip aningaasaqarneranut aalajangiisuunngillat, ingerlatseqatigiiffilli allappoq, saniatigut qaqinneqartut ataatsimut isertitsissutigineqarnerat qaqutigoortunik aatsitassanik piiaanermi aningaasartuutinut annikillisaataassasut.

Qineqqusaarnermi pingaarnertut sammineqartoq

Qinersinermut atatillugu suliniut pingaarnertut sammineqartut ilagisimavaat. Kalaallit Nunaanni ernummatigineqarsimavoq, suliniut ingerlanneqassappat pinngortitamut avatangiisinullu ajoqusiisinnaanera.

Aatsitassarsiorniarnermut isumaqataasut oqaatigisarpaat, aatsitassarsiorneq Kalaallit Nunaata aningaasaqarneranut annertuumik iluaqutaassasoq. Aatsitassarsiorfimmit naatsorsuutigineqarpoq, suliniut najukkami suliffinnik 300-ngajalluinnarnik pilersitsissasoq.