Greenland Minerals allamik taaguuteqalersoq

Australiamiut aatsitassarsiorfeqatigiiffiat Greenland Minerals-itut ilisimaneqartoq maanna Energy Transition Minerals-imik taaguuteqalerpoq

Australiamiut aatsitassarsiorfeqatigiiffiata 2007-imi pilersinneqartup siullermeerluni taaguutini aatsaat allanngortinngilaa.

Takuuk: Ingerlatseqatigiiffiup Australiami qullersaqarfiataana taaguutaa allanngortinneqartoq. Ilanngutassiaq Energy Transition Mineralsimi pisortaanerup Daniel Mamadou-p oqaaseqaatai ilanngullugit nutarterneqarpoq.

Greenland Minerals-ip pisortatigoortumik taaguutini sisamanngornermi Energy Transition Minerals-imut allanngortissimavaa.

Tamanna Australiamiut aatsitassarsiorfeqatigiiffiata nittartagaatigut nalunaarummi atuarneqarsinnaavoq. Ingerlatseqatigiiffimmi aktiaatillit taamatut aalajangersimapput.

Ingerlatseqatigiiffik 2008-imi pilersinneqarami Greenland Mining and Energy-mik taaguuserneqarsimavoq. Tassa Energy Transition Mineral taaguumminik aatsaat allannguilinngilaq, aatsaalli siullerpaamik taaguummut Kalaallit Nunaat ilaatinneqarani.

Isumaqatigiissitsiniartarfimmut suliassanngortitsisimasoq

Ingerlatseqatigiiffiup Narsap eqqaaniittumi Kuannersuarni aatsitassanik qaqutigoortunik piiaanissamut akuersissummik ukiorpassuarni pissarsiniartaraluareerluni, 2021-mi periutsini allanngortippaa.

Tamanna pivoq uranik piiaasinnaanerup misissuisinnaanerullu inerteqqutaalernerata kingorna. Ingerlatseqatigiiffiullu Kalaallit Nunaat Danmarkilu isumaqatigiissitsiniartarfimmut suliassanngortinniarlugit aarlerisaarsimavai - inerteqquteqaleraluartorluunniit ingerlatseqatigiiffik Kuannersuarni suliniummit tunuarnissamut suli piareeqqajanngilaq.

Ingerlatseqatigiiffik suliamik ingerlatsiinnarnissaq anguniarlugu isumaqatigiissitsiniartarfimmi suliap ingerlanneqarnissaanik piumasaqarpoq.

Ingerlatseqatigiiffik ilalerneqanngippat Energy Transition Mineral-imit piumasarineqarniarpoq, ingerlatseqatigiiffiup Australiamiut dollariannik aningaasaliissutigisimasai 130 miliuuniusut utertinneqarnissaat. Ingerlatseqatigiiffimmit aamma suliniummik ingerlatsiinnartoqarsimasuuppat isertitassaraluatut annaasassatut naatsorsorneqarsimasut amerlaqqataannik taarsiiffigineqarnissaq piumasarineqarniarpoq.

Isumaqatigiissitsiniartarfimmi suliap ukiuni arlalinni ingerlanneqarnissaa naatsorsuutigineqarpoq. Aatsitassanut Inatsisinillu Atuutsitsinermut Naalakkersuisoqarfimmi pisortap Jørgen Hammeken Holmip suliakkiissutip itigartitsissutigineqarnissaa naatsorsuutigaa.

Daniel Mamadou, administrerende direktør for Energy Transition Mineralsimi pisortaaneq Daniel Mamadou Kuannersuarni suliniummut atatillugu suli isumalluarpoq.

- Suliffeqarfimmit suli neriuutigaarput, Kalaallit Nunaanni Danmarkimilu naalakkersuisunik aaqqiagiinngissuteqarnerup piviusorsiortumik tamanullu naammaginartumik aaqqiissuteqarfigineqarnissaa, taanna oqarpoq.

Powered by Labrador CMS