Greenland Holdingimi siulersuisut nutaanik ilaasortaqalersut

Greenland Holding A/S-ip marlunngornermi ileqquusumik ukiumoortumik ataatsimersuarnerani, suliffeqarfissuaq 2020-mi 12,7 millioner koruuninik sinneqartooruteqarsimasoq saqqummiunneqarpoq. Ingerlatseqatigiiffik 2019-imi 5,3 millioner koruuninik amigartooruteqarsimavoq. 2020-mi sinneqartoorutigineqartut nammineq aningaasaatinut ilanngunneqassapput, taamalu 414,6 millioner koruuninik nammineq aningaasaateqalissalluni.

Naak naatsorsuutaaqqaartut sinneqartoorutissatut naatsorsuussat 17 millioner koruuninut inissinneqaqqaaraluartut, siulersuisut angusat iluarisimaarpaat:

- Corona-mik ajulusoortoqaraluartoq aammalu ukiup qaangiuttup nalorninarfiusimanera misigigaluarlutigu, angusaq kusanavissoq takutipparput, tamannalu angusap kinguneranik patajaallisaanissanut nutaanillu aningaasaliissuteqarfissanut sinneqartoorutaasut tapiussapput, siulersuisuni siulittaasoq Christian Motzfeldt oqarpoq.

Immikkoortortaqarfiit sinneqartooruteqartut

Immikkoortortaqarfik Innovation Greenland A/S 2020-mi 1,9 millioner koruuninik sinneqartooruteqarpoq, namminerlu aningaasaatai 4,3 millioner koruuniulerlutik.

Immikkoortortaqarfik alla, tassaasoq Greenland Venture 2020-mi 5,9 millioner koruuninik sinneqartooruteqarpoq, namminerlu aningaasaatai 177 millioner koruuniullutik.

Ataatsimeersuarnermi Siulersuisuni siulittaasoq Christian Motzfeldt siulittaasutut qinigaaqqippoq. Siulittaasup tullia Taitsiannguaq Olsen siulittaasup tulliatut qinigaaqqinngittoorpoq, aamma siulersuisuni ilaasortaq Vitta Motzfeldt ilaasortatut ingerlaqqippoq.

Siulersuisuni ilaasortat Hanne Kristiansen aamma Merete Lundbye Møller qinigaaqqillutik ingerlaqqipput.

Siulersuisuni ilaasortanngortut marluk nutaat tikilluaqquneqarput, tassaasut Lynges.gl-imik piginnittoq Miki Lynge aamma Air Greenlandip siulersuisuini ilaasortaajunnaaqqammersoq Jette Larsen. Taanna INI A/S-ip siulersuisuini siulittaasuusimavoq kiisalu Srctic Umiaq Linemi Illuut A/S-imilu pisortaasimalluni.

2021-mut ilimagisat

Ukioq 2021-imut Greenland Holding-ip missingersuusiai makititeqqinnissanut nutaanillu suliniuteqarfissani aningaasaliissuteqarnissat takussutissarivai – tamatumani suliffeqarfiup namminerisaminik ingerlataani aammali suliffeqarfiup ingerlataasa avataani ingerlatassani. Minnerunngitsumik coronap sunniuteqarnera pissutigalugu aningaasat tungaatigut suli nalunartoqarpoq, tamannalu aallaavigalugu siulersuisut ukioq 2021-ip naanissaani mianersortumik naatsorsuutigalugu annertunngitsumik sinneqartoorfiunissaa ilimasuutigivaat, ataatsimeersuarnermut atatillugu ingerlatseqatigiiffiup tusagassiorfinnut nalunaarutaani allassimavoq.

Innovation Greenland-ip suliniutinik nutaanik inerisaaneri maanna tamakkiisumik aallarnisaqqipput. Minnerunngitsumik Kalaallit Nunaanni Innovationscenter-i, taannaavormi Innovation Greenland-ip saniatigut, aammattaaq namminersortunik aammali pisortanit suliniuteqartuusut allat sulliviat:

- Kalaallit Nunaat tamakkivillugu nutaaliornerni inuussutissarsiornernilu suliffissanillu nutaanik pilersitsiortorfiunerini qitiulluni toqqammaviulluartussaq. Aallarnisaasunittaaq ineriartortitsinermik inuussutissarsiornikkulluunniit inerisaanerni ingerlataqartunut tapiissuteqartarneq, (inkubator-ordning), Naalakkersuisut aallarnisaasunut inuussutissarsiornermik siuarsaaneranni piginnaasanik inerisaanerni aammalu inuussutissarsiornikkut ilisimasanik ikorfartuiffianik tapertaalluartussaq suliarineqaleruttorpoq, ingerlatseqatigiiffimmit ilisimatitsissutigineqarpoq.