Greenland Expressip taamaatitsineri Air Greenlandip maluginngilai

Greenland Express Airfip timmisartuussinissaminik taamaatitsinerpassui Air Greenlandip aasaanerani angallassineranut malunniutinngillat.

– Greenland Expressip toqqaannartumik sunniuteqarneranut takussutissaqanngilagut, Air Greenlandimi aningaaasarsiornermut pisortaq Christian Kjeldsen oqarpoq.

Tunuartinngilaali piffissaq kingulleq atorlugu inniminniisoqartarsimasinnaavoq Greenland Express Airimut attuumassutilimmik.

– Pingaartumik Islandimut timmisartuussinitsinni piffissaq kingulleq atorlugu inniminniinerit GE-p ilaasuinut attuumassuteqarsinnaapput, tamannali ilisimasaqarfiginngilarput, Christian Kjeldsen Sermitsiaq.AG-mut allappoq.

Taassumali erseqqissarpaa nalinginnaasumik aasaq manna angalasoqarluarsimasoq, pingaartumik takornarianik, piffissarli kingulleq atorlugu inniminniinerunngitsunik.

Immikkut timmisartuliinngillat

– Ilaasut qanoq amerlatigisut GE-p (Greenland Express Airip, aaqqiss.) taamaatitsineranik eqqorneqarnersut takusinnaanngilarput taamaattumillu tamanna pissutigalugu immikkut timmisartuliisinnaanata, Air Greenlandip aningaasarsiornermut pisortaa Christian Kjeldsen oqarpoq.

Taassuma erseqqissarpaa angalasut 2014-imisut amerlatigippata Air Greenlandip immikkut timmisartuliinissaanut tunngavissaqanngitsoq.

Greenland Express Air, nalunaarsimasoq ullumikkumut, ataasinngorneq juulip 27-iannut, timmisartuussinerit tamaasa taamaatiinnarlugit, suli timmisartuussilinngilaq.