Greenland Express Air

Greenland Express ilumuunnginneraasoq

Suliffeqarfik Sarajevomi angerlarsimaffeqartoq pineqarnani suliffeqarfik Sofiami angerlarsimaffeqartoq pineqarpoq, Gert Brask paasissutissiivoq

Greenland Express, Narsarsuaq, passagerer
Greenland Express Air Narsarsuarmiittoq. Kujataamiorpassuit Danmarkimut toqqaannartumik attaveqaat tamanna nuannaarutigaat, tassa timmisartuussinerit taamaatiinnarneqarsimatinnagit. Asseq toqqorsivimmeersoq

Tusagassiorfinnut nalunaarummi kamassimarpaloqisumi Gert Braskip eqqartuussissuserisumik taarsiissuteqarnissamillu sioorasaariffigisaani atuarneqarsinnaavoq Sermitsiaq.AG Greenland Express Airip aasaq manna kikkunnik timmisartuussisoqarnissaanut atatillugu kukkussuteqarsimasoq.

Suliffeqarfiup taassuma Sarajevomi angerlarsimaffeqarani Bulgariami Sofiami angerlarsimaffeqarnera atuarneqarsinnaavoq.

Allaaserisaq Gert Braskip ilumuunnginneragaa matumani atuaruk

Gert Braskilli sullitani sooq timmisartuussinissat kinguartinneqarnerannik suli eqqortumik nassuiaattariaqarpai.

Allaaserisaq maani atuaruk

Kinguartitsineq sullitarpassuit Gert Braskimik tatiginnillutik Greenland Express Airimi bilitsimik pisisimasut eqqorneqaatigisaat maani atuaruk

Greenland Express Airip pisortaanera Gert Brask tusagassiorfinnut nalunaarutimini ima allappoq:

'Netavisen Sermitsiaq.AG juulip 3-ani allaaserisaqarpoq, Greenland Expressip timmisartuutileqatigiiffimmik B & H Airlinesimik Danmarkip Kalaallit Nunaatalu akornanni timmisartuussisalernissamini atuiniarneranik. Sermitsiaq.AG-p allaaserisaa naapertorlugu, Danmarkimi angallannermut aqutsisoqarfik timmisartuutileqatigiiffiup Greenland Express sinnerlugu timmisartuussisarnissaanut akuersissuteqarsimavoq.

Taamaattoqarneraaneq toqqaannartumik eqqunngitsuuvoq, Greenland Expressilu tamanna tunngavigalugu Sermitsiaq.AG naqqiissuteqarfigalugu ilumuunnginneraasariaqarpoq.

Greenland Express tamatuma akerlianik timmisartuutileqatigiiffimmut BH Airimut attartornissamik isumaqatigiissusiorsimavoq. BH Air Bulgariami Sofiami qullersaqarfeqarpoq, suliffeqarfiullunilu ingerlalluartoq aningaasarissaartorlu.

Timmisartuutileqatigiiffiit taakkua marluk akornanni piginnittoqarnikkut imminnut ataqatigiinngillat.

Greenland Expressip ilimagaa BH Airip aamma suliffeqarfiup Sermitsiaq.AG-p eqqartugaata akornanni taaguutitigut imminnut qaninnerat tunngavigalugu netavisip aaqqissuisoqarfia allaaserisamik pineqartumik tamanut saqqummiussinissamut paatsoortinneqarsimasoq. Isumarput naapertorlugu taama qalliinnarsiortigisumik paasiniaanerup allaaserisami piviusunik taama eqqunngitsigisunik pilersitseqataanera ajuusaarnarpoq.

Greenland Expressip Sermitsiaq.AG 2014-imili nalunaarfigaa, suliffeqarfiup nutaarsiassaqartitsivimmi tusagassiortut siunissami oqaloqatigiumajunnaarai. Isumarput naapertorlugu paasissutissanik pissarsiarineqartunik qalliinnarsiorpallaartumik misissuisarneq pissutigerpiarlugu tusagassiornerup pitsaassusaa nalinginnaasumik tutsuiginassuseqartutut oqaatigineqarsinnaanngimmat.

Greenland Express Sermitsiaq.AG-mi allaaserisat qulaani taaneqartut tunngavigalugit tusagassiorfimmut Sermitsiamut inatsisitigut alloriarnernik pilersitsisoqarsinnaaneranik inatsitigut siunnersortissarsiorniarpoq Greenland Express pillugu ilumuunngitsunik saqqummiussinikkut suliffeqarfimmik piaaraluni ajoqusiiniarsimasutut. Tamatumunnga atatillugu erseqqissaatigissavarput, inatsisitigut alloriarnerusinnaasut taamaallaat tusagassiorfiup Sermitsiap suliffeqarfimmik qaammaterpassuit ingerlaneranni ajoqusiiniarsimaneranik sapinngisamik pitsaanerpaamik killiliiniarnerussammata.

Sermitsiaq.AG soorunami ajuusaarpoq suliffeqarfiit marluk assigiinngajannik ateqartut BH Airlines Sarajevo, aamma BH Air, Sofia, paarlaassimagutsigik.

Greenland Express Airip pisortaanera Gert Brask Sermitsiaq.AG-mut piffissami sivitsortumi apersorneqarumasimanngilaq.

Greenland Express pillugu allaaserisat maani atuakkit

Powered by Labrador CMS