Greenland Express Air
Greenland Express Airip taamaatitsineranit Simon Lynge eqqorneqartoq
Kalaaleq nipilersortartoq nuannarineqartoq Simon Lynge Greenland Express Airip taamaatitsineranit eqqorneqarpoq. Qaqortumi aasaanerani nipilersornermik ilinniarfimmi peqataasinnaanngilaq
Nipilersortartoq Simon Lynge Greenland Express Airip taamaatitsineranit eqqorneqarpoq, taassuma Danmarkip Kalaallit Nunaatalu akornanni timmisartuussinissat tamaasa 2015-imi juulip 15-iata tungaanut taamaatimmagit.
Simon Lynge juulip 6-anniit 17-iannut Qaqortumi inuusuttunut nipilersornermik ilinniarfimmi ´Nipitu´-mi ilinniartitsisutut peqataasussaagaluarpoq. Facebook-imili quppernermigut allappoq peqataasinnaanani, Greenland Express Airip taamaatitsinera pissutigalugu.
´Greenland Expressip taamaatitsinera pissutigalugu Qaqortumi aasaanerani nipilersornermik ilinniarfimmi NIPITU-mi ilinniartitsisut peqataasinnaanngilanga, tamannalu ajuusaarutigeqaara. Greenland Express tamanut pisuuvoq, inuusuttullu ilinniartissinnaanngisakka utoqqatserfigaakka. Neriuppunga arlaanni tamatumunnga periarfissaqarumaarlunga´.
Simon Lynge Facebookimi quppernermini allappoq.
Attaveqarfigineqarsinnaanngilaq
Greenland Express Airip nalunaarutiginngilaa taamaatitsinermigut qanoq amerlatigisut eqqorneqarnersut. Sermitsiaq.AG-p Greenland Express Air attaveqarfiginiaraluarpaa paasiniarlugu taamaatitsiinnarnikkut inuit qanoq amerlatigisut eqqorneqarnersut. Timmisartortitseqatigiiffiulli telefonia nammineq akisartunngortinneqarsimavoq.
Greenland Express Airip pisortaanera Gert Brask sivisuumik Sermitsiaq.AG-mit apersorneqarusuttarsimanngilaq.