Greenland Express Air

Greenland Express Airip Air Greenland iluanaartissinnaavaa

Greenland Express Airip timmisartuussisalernerata kingorna Air Greenland akinik allannguilersaanngilaq

Air Greenlandip pisortaanerata Michael Højgaardip unammillerneqarnerulernerup qanoq kinguneqarsinnaanera utaqqimaarallarpaa

Greenland Express Airimit unammillerneqarnerup qanoq kinguneqarumaarnissaa Air Greenlandip utaqqimaarallarpaa akinik allannguisinnaanerup isummerfiginnginnerani. Unammillertiulersup Air Greenland iluaqusersinnaavaa aammali annaasaqartissinnaallugu, Air Greenlandip pisortaanera Michael Højgaard oqarpoq.

Atuaruk: Danmarkimi ilinniartoq: Ukiumut marloriarlunga angerlarnissamut akissaqalerpunga

Greenland Express siullerpaamik Narsarsuarmut marlunngornermi tikippoq kinguaattooraluarlunilu maanna Danmarkimut uteriareerluni.

Akinik allannguissanngillat
Maanna Danmarkip Nunattalu akornanni Island aqqusaarlugu angalaniaraanni timmisartuutileqatigiit assigiinngitsut pingasut toqqarneqarsinnaalerput. Tassaapput Air Greenland, Icelandair aammma Greenland Express Air.

Air Greenlandip Nuummiit Reykjavikimut timmisartuussinermi akit malunnaatilimmik 2011-mi appartippai. Maannalu tassa nutaamik unammillerteqalerpoq.

- Greenland Expressip Kalaallit Nunaannut timmisartuussisalernerata kinguneranik akinik allannguinissamik pilersaaruteqanngilagut. Soorunami pissutsit malinnaaffigiuarparput aammalu nalilersortuarlugu akigititavut unammillersinnaanersut, Air Greenlandimi pisortaaneq Michael Højgaard oqarpoq.

Greenland Express Nunatsinni illoqarfiit akornanni timmisartuussineq ajorpoq. Taamaammat Greenland Expressimut ilaallutik Kangerlussuarmut Narsarsuarmullu tikittut Air Greenlandimut ilaallutik illoqarfinnut allanut ingerlaqqittartussaapput.

- Imaassinnaavoq pisisartut nutaarluinnaat Greenland Express aqqutigalugu Kalaallit Nunaaliartalersut Kalaallit Nunaanni illoqarfiit akornanni timmisartuussinernut amerlanerusunik ilaasoqarnermik kinguneqartumik, Michael Højgaard oqarpoq.

Greenland Express Air pillugu allaaserisat annerusumik uani atuarsinnaavatit

Greenland Express Airip timmisartuussisalernera pillugu Air Greenlandip qisuariaataa Sermitsiami tallimanngornermi saqqummersumi takinerusumik atuarsinnaavat.

Powered by Labrador CMS