Skip to main content

Greenland Express Airimik atuisut assigiinngitsumik pineqarsinnaapput

Greenland Express Airip siusinnerusukkut timmisartuussinernik taamaatitsinermi atuisumi selskabinut allanut ilaanissaat akiliuttarsimavaa. Maanna biletsip akia kisimi utertinneqassaaq, atuisullu annertunerusumik pineqarnissaannut sumi najugaqarnerat apeqqutaavoq

– Billetsinik pisinermi akiliutaasimasut piaarnerpaamik utertinneqassapput, toqqaannartumik kreditkortselskabimit aningaaserivimmilluunniit, akiliinermi atorneqarsimasumit.

Marlunngormat Greenland Express Air taamaatitsinerit kingulliit pillugit atuisartuminut taamatut mail-imik nassiussivoq. Selskabi nutaamik periuseqalersimavoq, taassuma 2014-imi timmisartuussinernik taamaatitsinerni atuisut siullerpaamik Air Greenlandimut ilaaneranni immikkut aningaasartuutaat akilertarsimammagit.

Taamaatitsinermi angalasut taarsiivigineqarnissamik piumasaqarsinnaanersut Forbruger Europami inatsisileritooq fuldmægtigilu Anette Jin Kristensen naapertorlugu imaasiallaannaq akineqarsinnaanngilaq:

– Atuisartut inuussutissarsiutillillu, EU-p iluani avataanilu najugallit pineqartillugit ajornakusoortorujussuusinnaavoq. Pingaartumik inatsisinut arlalinnut attuumassuteqarmat EU-p iluani imaluunniit EU-mut EU-miillu timmisartuussisoqarnersoq. Assersuutigalugu asmma aalajangiisuuvoq sumi najugaqavinneq, inuiaassuseq apeqqutaatinnagu.

Atuisartunik sullissivik qaninnerpaaq attaveqarfigiuk

Anette Jin Kristensen naapertorlugu aallaqqaammut pissusissamisuussaaq eqqorneqartut inatsisinik ilisimasalinnut saaffiginnippata:

– Kalaallit Nunaat EU-mut ilaasortaanngimmat maalaarutip inernissaanut aalajangiisuusinnaavoq malittarisassat suut atorneqarnerat. Taamaattumik kajumissaarutigiinnarsinnaavarput aallaqqaammut atuisartunik sullissivimmut qaninnerpaamut saaffiginnittoqassasoq. Danmarkimi, nunani allani EU-mut ilaasortaasuni, Islandimi Norgemiluunniit najugaqavissunut pissutsinik taamaattunik pisoqaraangat Forbruger Europa imaluunniit attaveqarfivut pissutsit atuuttut malillugit ikiuussinnaavoq.

Aningaaseriviit utertitsinissamut ikiuunniarput

Aallarnissamut taamaatiinnarsimasumut akiliutit utertinniarnissaat ajornannginneruvoq. Taamatut oqaluttuarpoq Christina Strand Malmstrup, Nuummi Banknordik-imi atuisartunut inuinnarnut pisortaq:

– Nalinginnaasumik timmisartortitseqatigiiffiit atuisuminnut namminneq utertitsisarput. Atuisup aningaasat utertissimanngikkunigit, kortimillu Banknordik-imeersumik akiliisimaguni, akiliinermut maalaaruteqarniarluni saaffigisinnaavaatigut. Tamatumunnga pissutaavoq nioqqut tunniunneqartoq tunniunneqarsimanngitsutut oqaatigineqarsinnaammat.

Tamanna peqatigalugu Christina Strand Malmstrupip pingaarutilittut erseqqissarpaa apeqqutaanangitsoq korti suna atorlugu akiliisoqarsimanersoq:

– Aallaavittut assigiinngissuteqanngilaq akiliinermi kortit atorneqarnerpaat ilaat soorlu Visadankort, Dankort imaluunniit Mastercarda atorneqarsimanersoq. Taamatut aningaasat utertinniassagaanni sapinngisamik sukkasuumik qisuariartoqartariaqarpoq.

Banknordikimi inuinnartut atuisartunut pisortap tamanna peqatigalugu innersuussutigaa Finansrådip nittartagaa, tassani internettikkut kreditkortimik akiliinermi ajornartorsiutit nalinginnaanerpaat sammineqarsimammata.

Greenland Express Airip pisortaanera Gert Brask sivisuumik Sermitsiaq.AG-mut apersorneqarusussimanngilaq. Qaammat manna siusinnerusukkut taamatut nalunaaqqippoq. Sermitsiaq.AG-p Greenland Express oqaloqatiginiartuaraluassavaa.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER