Greenland Express Air aallartinnissaminut ajornartorsiuteqarpoq

Greenland Express Airimut ajornartorsiutit imaaginnavipput.

Timmisartuutileqatigiiffiup Hollandiminngaanneersup Denim Air ACMI-p timmisartuutaa Fokker-100, Greenland Express Airip timmisartoq attartugaanut piginnittut, suli timmisartup angallassinissaanut akuersissummik inissitaqarsimanngilaq.

Timmisartumik angallannermik tusagassiivik check-in.dk nalunaarpoq.

Timmisartoq Hollandimeersuusutut allaqqassaaq. Naak akuersissutit Hollandip timmisartukkut angallannermi aqutsisoqarfimmut sapaatip akunneri pingasut matuma siornali nassiunneqarsimagaluartut suli qisuariaammik tigusaqanngillat. Taamaammat timmisartoq suli ilaasoqarluni suli angallassisinnaanngilaq.

Aqutsisut apeqqutaasut
Hollandimi aqutsisoqarfimmit akuersissutit akuerineqariarpata Danmarkimi aqutsisoqarfimmut aamma qinnuteqartoqassaaq.

- Marlunngorpat angallassinavianngilagut. Ataasinngorpat akuersissutit nassiunneqarsimappata, Danmarkimilu aqutsisoqarfik sukkasuumik sulisinnaassappat angallassisoqarsinnaassagaluarpoq. Aqutsisoqarfinni qanoq sukkatigisumik sulisoqassanersoq aqussinnaanngilarput. Aqutsisoqarfiit aalajangissavaat qaqagu angallassisoqarsinnaalissanersoq, Denim Air ACMI-mi pisortaq Ronald Janssen check-in.dk-mut oqarpoq.

Pingasunngormat: Teknikkikkut ajoqqutit
Taassunga atatillugu Greenland Express Arip aallarniisuata pisortaatalu Gert Braskip check-in.dk-mut oqaaseqarfigerusunngilaa.

Timmisartoq teknikkikkut ajornartorsiuteqartoq pingasunngormat Sermitsiaq.AG-mut oqaatigineqarpoq.Taamaammallu ataasinngorpat junip aappaani attartorneqarluni Aalborgimiit angallassinissaralua siulleq kinguartinneqartussanngortoq nalunaarutigineqarluni.