Greenland Cruises nannunik takornariartitsineq pillugu: Inatsisit malissaqqaarpagut
Greenland Cruises sisamanngorpat nannunik takornariartitsissaaq. Takornariartitsinissaq innuttaasut ilaannit isornartorsiorneqarpoq, inatsisinik unioqqutitsinertut taaneqarluni. Suliffeqarfiulli taama oqarneq eqqunngitsuunerarpaa.
Qeqertarsuatsiannut nannunik takornariarit.
Greenland Cruises, Nuummi eqqaanilu imaatigut angalatitsisartoq, taama neqeroorpoq.
Nannut pingasut, arnaviaq piaqqallu marluk, Qeqertarsuatsiaanni ataasinngormat takuneqarput. Qimaatinneqaraluarput, marlunngornermili takuneqaqqillutik.
Nannunik takornariartitsinissamut periarfissiinissaq, Greenland Cruisesip sapagiinnanngilaa. Piginnittoq, Ivik Knudsen-Ostermann nannunik takornariartitsissalluni sisamanngornermut pilersaarusiorpoq.
Isumassarsiarli inatsisinik unioqqutitsisutut isornartorsiorneqarpoq, nannut qammarneqaratillu, qanillattorneqaratillu akornusersorneqaqqusaannginnerat pillugu.
- Qeqertarsuatsiaannut umiatsiassaagut, nunaqarfimmullu niulluta. Taakanngaanniit nannut takusinnaassavagut. Tamanna neriuutigaarput, Ivik Knudsen-Ostermann oqarpoq nangillunilu:
- Nannut qanillattornavianngilagut, inatsisit maleruagassallu malissaqqaarpagut.
Naalakkersuisoqarfik peqataaqquneqartoq
Greenland Cruises ilisimatitsivoq takornariarnissamut marluk peqataajumallutik nalunaarsimasut.
Suliffeqarfik takornariartitsinissaq pillugu aalisarnermut, piniarnermut nunalerinermullu naalakkersuisoqarfimmit attaveqaqateqarpoq, immikkoortortamilu pisortaq angalaqataanissamut qaaqquneqarsimalluni. Taama neqeroortoqarpoq takornariartitsinermi inatsisinik maleruagassanillu malinninnissaq takutikkumallugu.
- Neriuppunga silaqqissasoq angalanerlu ajunngitsumik ingerlassasoq. Qangatsianngorpoq Qeqertarsuatsiaaniikkama, tikeqqillugu aamma nuannissaaq, Ivik Knudsen-Ostermann naggasiivoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...