Skip to main content

Greenland Contractors Pituffik pillugu suliami ajorsarpoq

Suliffeqarfiup Exelis Servicesip Pituffimmi kiffartuussinissamut isumaqatigiissutaa allanngortinneqassanngilaq. Greenland Contractors suliffeqarfiillu marluk suliarinnittussarsiussinermi naammangittaallioraluarnerat kinguneqanngitsoorpoq

Greenland Contractors, Per Aarsleff aamma Copenhagen Arctic Pituffimmi kiffartuussinissamut isumaqatigiissummut aalajangiisoqarneranut naammagittaalliutaat Amerikarmiut suliarinnittussarsiussinermi naammagittaalliortarfimmi suliarineqarmat aalajangiunneqartoq allanngortinneqanngilaq. 

Exelis Servicesip Pituffimmi kiffartuussinissamut isumaqatigiissutaa septembarip 30-anit aallartittussaq atuuttussanngortillugu Amerikarmiut suliarinnittussarsiussinermi naammagittaalliorfik Government Accountability Office aalajangerpoq. Exelis Servicesip Pituffimmi kiffartuussinissamik isumaqatigiissutaa ukiuni arfineq marlunni atuutissaaq. 

Suliffeqarfiit pingasut naammagittaallioraluarput isumaqatigiissut malillugu suliffeqarfik Danmarkimit Kalaallit Nunaanniilluunniit isumaqatigiissuteqarfigineqartussaammat, taamaattumik Exelis Service tassunga piumasaqaammut tulluartuunngitsoq isumaqarlutik. 

Exelis Services Danmarkimi allattorsimaffimmiippoq kisianni amerikarmiut suliffeqarfiata Vectrusip suliffeqarfiutigaa. 

Akisussaassusilimmik suliaqarnissaq
Danskit inatsisai piumasaqaataallu malillugit sullissisoqassasoq Exelis Services tusagassiuutinut nalunaaruteqarpoq. Maannakkut atorfeqartut atorfinitsinneqarnissaat kiisalu Danmarkimi Kalaallit Nunaannilu akileraartarnissaq siunnertarineqartoq aamma nalunaarutigineqarluni. 

- Exelis Services A/S-ip eqqortumik sullissinissaa Danmarkimi Kalaallit Nunaannilu innuttaasunut paasitikkusupparput. Inatsisit atuuttut, maleruagassat piumasaqaatigineqartullu malillugit sullissisoqassaaq, aamma innuttaasunut eqqortumik sullississaagut, nalunaarutigineqarpoq. 

Greenland Contractors, Namminersorlutik Oqartussanit aamma MT Højgaardimit pigineqarpoq, Pituffimmi kiffartuussinissamik maannakkut isumaqatigiissuteqarpoq. 

Isumaqatigiissutip nalinga: 2,5 milliard koruunit missaat
Exelis Services A/S-ip Pituffimmi kiffartuussinissamut isumaqatigiissuteqarnera oktobarip 31-ani 2014-mi pivoq. Pituffimmi kiffartuussinissamut isumaqatigiissut 2,5 milliard koruunit missaannik naleqarpoq.

Kiffartuussinissamut isumaqatigiissummik aamma qinnuteqartut -  Greenland Contractors I/S, Copenhagen Arctic A/S aamma Per Aarsleff A/S - amerikarmiut suliarinnittussarsiussinermi naammangittaalliortarfimmi suliarinnittussarsiussinerup ingerlasimanera naammagittaalliutigaat. Naammagittaalliorneq Dansk Industrimit taperserneqarpoq. Kisianni naammagittaalliut amerikarmiunit itigartinneqarpoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER