Great Greenland: Puisit amiisa Danmarkimut akigineqarnerat minkit toqorarneqareernerani qaffanngitsut
Minkit millionit arlaqartut toqorarneqarnikuunerisa kingunerisassai suli Great Greenlandimiit malugineqanngillat. Puisit amiisa Danmarkimut tunineqartartut allanngunngillat, Norgemut Canadamullu tunisat amerlipput.
Great Greenlandimi puisit amiinik 4.500-inik ukioq kingulleq junimut sanilliullugu amerlanerusunik toqqorsivimmiittuuteqalersimallutik, suliffeqarfiup pisortaata, Preben Møller Sermitsiaq.AG-imut oqarpoq.
- Danmarkimi minkit toqorarneqareersullu amerlasoorujussuit tunisagut qaffassimanersut apeqqutigisarpaat. Danmarkimut ammit tunisagut maannamut allanngunngillat tunisassiornerunissamullu arlaatigut aamma pilersaaruteqanngilagut. Norgemiit Canadamiillu pisisartut amerlinikuupput, Great Greenlandimi pisortaq, Preben Møller nassuiaavoq.
Kopenhagen fure, tassa Danmarkimi amernik tunisassiorfik suli ukiuni marlunni minkit amiinik tunisaqarsinnaalluni oqaatiginikuugaa, Great Greenlandip aamma nassuiaatigaa.
Naammasseriikkat tuniniarneqarneri annertusarneqassapput
Great Greenland nioqqutissanik naammasseriikkanik (accessories), ilaatigut isersimmatit, aaqqatit, nasat tassillu nioqquteqarluarsimavoq. Nioqqutissat taakkua 2020-mi tunisaalluarsimammata tuniniarneqarnissaat annertusaaffiginiarpaat.
- Massakkuugallartoq accessories-inik taasartakkagut tuniniarneqarnerunissaat soorunami ingerlatissavarput. Nittartakkatsinni tunisagut amerlisut malugisinnaavarput. Soorlu Norgemiit Canadamiillu pisisartut amerlatsissimasut, Preben Møller oqarpoq.
Tunitsiviit amerlanerusut
Great Greenlandip ammit 30.000-t tunissallugit naatsorsuutigigaluarpaa, kisianni 2020-mi 23.000-innaasimapput. Suliffeqarfiulli amernik amerlanernik ukiup siualia sanilliussagaanni tunisaqarpoq.
Puisit amiinik maangaannartitsisarneq igitsisarnerlu Naalakkersuisut akiorniarlugu annertunerusumik ukkatarinninniartut Mala Høj Kúkop Inatsisartut suleriaasianni paragraf 37 naapertorlugu Naalakkersuisunut apeqquteqareernerani, Naalakkersuisut akissutaani erserpoq.
Great Greenlandimut kiffartuussinissamut isumaqatigiissummi nuna tamakkerlugu tunitsiviit 38-usinnaapput, maannalu tunitsiviit 32-upput.
- Tunitsiveqarneq imaanaanngitsorujussuuvoq inissaqarnissaq pinngitsoornanilu innaallagiaqarnissaq imeqarnissarlu ukiukkullu kiassarsinnaanera pingaaruteqarpoq. Ilaatigut taakkua 38-nik suli tunitsiveqannginnitsinnik pissutaapput, Preben Møller oqarpoq.
Puisit amiinik eqqaasarneq ammillu pitsaassusissaat eqqarsaatigalugit Great Greenland Naalakkersuisuniit ingerlaavartumik oqaloqatigineqartartoq, Naalakkersuisut paasissutissiipput.