Great Greenlandip naatsorsuutai: Amigartooraluarluni naammagisimaarinninneq
Ammerivik ukiumi naatsorsuiffiusumi kingullermi minnerusumik amigartooruteqarpoq. Pisortaanerup angusaq naammagisimaarpaa
Great Greenland 256.361 koruuninik amigartooruteqarpoq.
Ammerivik siornat 1,8 millionit koruuninik amigartooruteqarpoq, taamaalillunilu 2017-imut sanilliullugu 1,5 millionit koruunit missaannik pitsanngoriartoqarpoq.
Ammerivik tusagassiuutinut nalunaarummi taama allappoq.
Pisortaq naammagisimaarinnippoq
Ingerlatsinermi angusat eqqarsaatigalugit suliffeqarfik 1,1 millionit koruuninik sinneqartoorfiuvoq. Tamannalu angusaq pitsaasoq anguneqarpoq, naak tunisassiornermi atortunik ajortoornerit arlallit unammillernartullu allat pisimagaluartut.
- Ingerlatsinermi angusat pitsaasut siuariartornerlu angusinnaasimagatsigit naammagisimaarpara. Tamannalu aamma sulisut sulilluarnerisigut anguneqarpoq. Nuannerpoq takusinnaallugu suliffeqarfiup ingerlalluarnissaanut sulisut suleqataanerat, pisortaaneq Preben Møller, tusagassiuutinut nalunaarummi taama oqarpoq.
Puisip amii tunisat amerlanerusut
Ammit tunineqartut 2017-imut sanilliullugu 5.000-nik amerleriartut, taanna ilisimatitsivoq.
- Pingaaruteqarporlu ataavartumik KNAPK-mik oqaloqateqarnerput, tassami piniartuuneq siuarsarusupparput taamatullu suli puisit amii tunineqartartut amerlisikkusuppagut, Preben Møller oqarpoq.
Siulersuisut tamarmiusut qinigaaqqipput, siulittaasoq Juliane Henningsen ingerlaqqissaaq. Juliane Henningsen-ip saniatigut siulersuisuni ilaasortaapput: Tommy Ege Kristensen, Erik Sivertsen, Anette H. Lings aamma Niels Boassen.