ukiumut naatsorsuutit
Great Greenlandip 2013-mi angusai naammagineqanngillat
Naak Great Greenlandimut ukioq imaannaanngikkaluartoq suliffeqarfik sinneqartoorpoq. Sinneqartoorutilli naammagineqanngillat
Great Greenland 6 million koruuninik sinneqartoorpoq 2013-mi.
Ukiumoortumik nalunaarummi atuarneqarsinnaavoq 2013-imi sinneqartoorut 5,9 million koruuniusut.
Ukiumili angusat mianersortumik tiguneqassapput, tassa Great Greenlandip siusinnerusukkut suleqatigisimasaanut eqqartuussivilersuunneqarniarnera suli aalajangiiffigineqannginnera pissutigalugu. Tassani Great Greenland 32 million koruuninik piumasaqaateqarpoq.
Piumasaqaat taanna ukiumoortumik nalunaarusiamut ilanngunneqarsimanngitsuuppat Great Greenland 26,6 million koruuninik amigartooruteqarsimassagaluarpoq.
Naalakkersuisunit Great Greenlandimilu inernerusoq naammaginartinneqanngilaq, tamannalu maanna suleqatigiunnaakkamit North Atlantic Fur Group ApS-imit isumaqatigiinnginnermik peqquteqarpoq.
Siulersuisut allanngortinneqartut
Great Greenlandip siulersuisuisa ataatsimiinneranni Dorthea Rødgaard, Erik Sivertsen aamma Annette Kreiner siulersuisuni ilaasortanngortinneqarput.
Nauja Bianco, Mike Nicolaisen aamma Karen Simonsen siulersuisuni ilaasortaajunnaarput, siulersuisuni siulittaasoq Bruno Olesen siulittaasutut taaneqaqqilluni.
- Naalakkersuisut sinnerlugit Great Greenland A/S 2013-imi suleqatigiilluarsimanitsinnut qutsavigerusuppara. Ukiuni kingullerni ingerlatseqatigiiffimmut aningaasarliorsimanerup kingorna Kopenhagen Furimik isumaqatigiissut iluaqutaajumaartoq neriuutigaara. Ingerlatseqatigiiffimmut piffissami imaannaanngitsumi siulersuisunut ilaasortat tunuartut sulilluarsimapput. Naalakkersuisut taakkuninnga nersorinninnerat sulinerannullu qujassutaat apuukkusuppara, Naalakkersuisut siulittaasuat Aleqa Hammond oqarpoq.