tillinniarnerit
Great Greenland tillinniarfigineqaqattaartoq
Glostrupimi ammeriviup saqqummersitsisarfia sisamariarluni tillinniarfigineqarsimavoq nioqqutissat 4 million koruunit sinnerlugit nalillit tillinneqarlutik. Inuussutissarsiutigalugu tillinniarnerit juullimi tunisat ilarujussuinik akeqarput, maannalu aamma 2017-imi tunisinissamik aarlerinartorsiortitsillutik.
Danmarkimi inuulluarniutinik niutertarfiit pisiniartartuisalu kisimik Kalaallit Nunaanniit puisip amianik atisaliat soqutigilersimanngilaat.
Namminersorlutik Oqartussat ammeriaviani Great Greenlandimi kavaajaaqqat pooqattallu isertuaniartunit aamma soqutigineqalersimapput. Københavnip qanittuani Glostrupimi Great Greenlandip saqqummersitsisarfia qaammatini kingullermi marlunni inuussutissarsiutigalugu tillinniarit sisamariarluni tillinniarfigineqarsimavoq.
Nammineq taarsiineq akisooq
Katillugit puisip amianik kavaajalianik pooqattanillu 2 million koruuninik nalilinnik tillinniartoqarsimavoq. Taakku tuninerat 4 million koruunit sinnerlugit naleqarpoq. Tillinniartoqarnerilu tamaasa Great Greenland nammineq 250.000 koruuninik taarseeqqaartassaaq.
- Tillinniarnerit siulliit annertunerupput, siullerpaaq annertunerpaalluni. Ataatsimi engrosimi 800.000 koruuningajannik naleqartunik tillipput, tassalu niuertarfimmi tunigaanni 2 million koruuningajannik nalillit. Amermik kavaajaliaapput kavaajaaraliaallutillu. Igalaaq aserorlugu iserput nivinngaaviit imaarlugit, 5 minutsit qaangiuttut aneqqillutik, Great Greenlandimi pisortaq Ditte Sorknæs oqarpoq.
Tillinniat kinaassusersineqanngitsut
Ilimanarpoq Kalaallit Nunaannit kavaajat tillitat nunani allani tuniniarneqassasut. Great Greenland naapertorlugu politiit tillinniartut kinaassusersisinnaasimanngilaat.
Allaaserisaq tamaat AG-mi atuaruk - linki uani ataaniittoq tooruk.